უკვე მოძველებული "ვოლგა" კარგა ხანია რეაბილიტაციას და ახალ შესაძლებლობებს ელის და აი, დადგა კიდეც ეს დღე, როცა დღის სინათლეს ახალი "ვოლგა სიბერი" მოევლინა.

რუსეთში ახალ მოდელს 21 - ე საუკუნის ავტომობილსაც უწოდებენ, თუმცა, როგორი იქნება რეალურად ეს კარგად დავიწყებული ძველი მანქანა, დრო გვიჩვენებს. "გაზ"- ში უკვე მომზადებულია გასაყიდი პარტია, რომელიც 500 ერთეულისგან შედგება.

მაშ ასე, რას წარმოადგენს "ვოლგა სიბერი", რომელიც მესვეურთა ვარაუდით, რუსული ბაზრის ბესტსელერი უნდა გახდეს:
"ვოლგა სიბერი" 2 ლიტრიანი მოცულობის ძრავით აღიჭურვა, რომლის სიმძლავრე 141 ცხენის ძალაა. გარდა ამისა, აქვს კომფორტისათვის აუცილებელი თითქმის ყველა კომპონენტი. კერძოდ, კონდიციონერი, უსაფრთხოების ორი ბალიში, ჰალოგენური ფარები და ასე შემდეგ.

"ვოლგა სიბერი" ასევე აღიჭურვება როგორც ავტომატური, ისე მექანიკური სიჩქარეთა გადაცემის კოლოფით და 2, 4 და 2, 7 ლიტრიანი მოცულობის ძრავებით.

ახალი "ვოლგა სიბერი" 18-დან 21 ათას ამერიკულ დოლარამდე ეღირება.