ქართველ კანონიერ ქურდს ციხეში სასჯელი დაუმატეს, რადგან მთელი კოლონია საკუთარი ზეგავლენის ქვეშ მოაქცია
სარატოვის საოლქო სასამართლომ 39 წლის კანონიერ ქურდს - ბესიკ კვინიხიძეს, რომელიც კრიმინალურ სამყაროში "ბესო რუსთავსკის" სახელით არის ცნობილი, 8 წლით თავისუფლების აღკვეთა მიუსაჯა. ამის შესახებ გამოცემა "ვერსია სარატოვი" სასამართლოს პრესსამსახურზე დაყრდნობით იუწყება.
კრიმინალური ავტორიტეტი სასჯელს განსაკუთრებული რეჟიმის კოლონიაში მოიხდის. იგი დამნაშავედ სცნეს რუსეთის ფედერაციის სისხლის სამართლის კოდექსის 210.1 მუხლით („კრიმინალური იერარქიაში უმაღლესი თანამდებობის დაკავება“).
სასამართლომ დაადგინა, რომ ბესო რუსთავსკი მე-7 სპეციალური რეჟიმის კოლონიაში ყოფნისას ახორციელებდა დანაშაულებრივ ზეგავლენას მსჯავრდებულებზე, ეწეოდა მათგან თანხების გამოძალვას "ქურდების საერთო ფონდსითვის".
თანხები სასჯელაღსრულების დაწესებულებიდან ზონის გარეთ მყოფი რეგიონის კრიმინალური სამყაროს წარმომადგენლების მხარდასაჭერად გადიოდა.
ფოტოზე : ბესო კვინიხიძე(ბესო რუსთავსკი) და თემურ კალბა(გული)-2013 წელი
პროკურატურის მასალებიდან ირკვევა, რომ კვინიხიძე 2013 წლის ივნისში აკურთხეს ქურდად, ხოლო 2019 წლის აპრილიდან 2020 წლის 8 სექტემბრამდე კრიმინალურ იერარქიაში უმაღლესი თანამდებობა დაიკავა სარატოვისა და ჩელიაბინსკის ოლქების კოლონიებში. კრიმინალური სტატუსის საჩვენებლად კვინიხიძემ სხეულზე შესაბამისი ტატუ გაიკეთა.
მისი დანაშაული თვითმხილველებმაც დაადასტურეს.ბესო კვინიხიძეს ზეგავლენით და ბრძანებით კოლონიის პატიმრები მუდმივად არღვევდნენ შიდაგანაწესის წესებს და არ ემორჩილებოდნენ ციხის ადმინისტრაციას.
