75 წლის აშშ-ს ყოფილმა პრეზიდენტმა დონალდ ტრამპმა GB News-ისთვის ინტერვიუ მისცა ბრიტანელ პოლიტიკოს ნაიჯელ ფარაჯს, რომელშიც მან 40 წლის მეგან მარკლიც გააკრიტიკა.
მან მეგანი სამეფო ოჯახის უპატივცემულობაში დაადანაშაულა და თქვა, რომ ის თავის 37 წლის ქმარს, პრინც ჰარის უბრალოდ იყენებს:

“მე არ ვარ მისი თაყვანისმცემელი, არც არასდროს ვყოფილვარ. მგონია, რომ ჰარის საშინლად იყენებენ და ოდესმე ამას ინანებს. ვფიქრობ, ამან გააფუჭა მისი ურთიერთობა ოჯახთან და ტკივილი მიაყენა დედოფალს. ვფიქრობ, რომ ის ძალიან უპატივცემულოა სამეფო ოჯახის მიმართ და რაც მთავარია დედოფლის მიმართ."

მან ასევე დაგმო მეგანის მიმართვა აშშ-ს კონგრესში, რომელშიც ქალი სიტყვით გამოვიდა მშობლის ანაზღაურებადი შვებულების შემოღების შესახებ და მის ქმედებას "უადგილო" უწოდა:

“ის ისეთი რამის გაკეთებას ცდილობს, რაც, ჩემი აზრით, სრულიად უადგილოა"
ტრამპს არასოდეს დაუმალავს, რომ მეგან მარკლის მიმართ არ აქვს სიმპათია. ორი წლის წინ მან საჯაროდ ქალს "საშინელი" უწოდა. ჰერცოგინიას, უნდა ითქვას, ასევე არასდროს ჰქონია განსაკუთრებული სიყვარული ტრამპის მიმართ - ის მას ქალთმოძულედ მოიხსენიებდა, გარდა ამისა, მეგანი ყოველთვის ღიად უჭერდა მხარს დემოკრატებს, ხოლო ტრამპი რესპუბლიკელია.