უკვე ცნობილია, როდის დაიწყება დედოფლისწყაროს მდ „იორიდან“ წყალმომარაგების სამუშაოები

კახეთი

2021, 20 მაისი, 18:50

დედოფლისწყაროს უწყვეტი წყალმომარაგების პერსპექტივა კიდევ უფრო რეალური გახდა. ახლახან გაირკვა, რომ მდინარე „იორიდან“ დედოფლისწყაროს ცენტრალურ რეზერვუარამდე წყლის მარაგის ამოსატუმბად გამოცხადებულ ტენდერში კომპანია "კომპორტმშენ XXI"-მა გაიმარჯვა. ჯამში 57 მილიონი ლარი დაიხარჯება.

20 მაისს კომპანია "კომპორტმშენი XXI"-ის თანამშრომლები დედოფლისწყაროს მუნიციპალიტეტს სამუშაო ვიზიტით ეწვივნენ და დედოფლისწყაროს მერიაში შეხვედრა გამართეს. მათთან ერთად ჩამოვიდნენ საქართველოს გაერთიანებული წყალმომარაგების კომპანიის თანამშრომლებიც. მას შემდეგ, რაც "კომპორტმშენი XXI" მდინარე იორიდან დედოფლისწყარომდე ქსელს მოაწყობს, ახლადაგებული ინფრასტრუქტურა სწორედ გაერთიანებული წყალმომარაგების კომპანიას გადაეცემა, რომელიც დედოფლისწყაროს მთავარ რეზერვუარს ივრის წყლით შეავსებს და წლობით არსებული უწყლოობის პრობლემის მოგვარებაც სწორედ ამ გზით იგეგმება.

ქ. დედოფლისწყაროში და მეზობელ სოფლებში სასმელი წყლის დებეტის გაზრდის მიზნით ინფრასტრუქტურული სამუშაოები უახლოეს პერიოდში დაიწყება-ამის შესაებ განცხადება მერიაში დღეს გამართულ შეხვედრაზე გაკეთდა.

სამუშაო შეხვედრას დედოფლისწყაროს მუნიციპალიტეტის მერი ნიკოლოზ ჯანიაშვილი, მერის მოადგილე დავით ფხოველიშვილი, საქართველოს გაერთიანებული წყალმომარაგების კომპანიისა და შპს “კომპორტმშენ XXI”-ის წარმომადგენლები ესწრებოდნენ.

დედოფლისწყაროს მუნიციპალიტეტში ქ. დედოფლისწყაროს, სოფლების ხორნაბუჯისა და სამრეკლოს წყალმომარაგების სისტემის რეაბილიტაცია-მშენებლობის სამუშაოებს ტენდერში გამარჯვებული კომპანია „კომპორტმშენ XXI” მომავალი თვიდან შეუდგება. პროექტის ფარგლებში მდინარე ივრიდან ამოიტუმბება სასმელი წყალი და შესრულდება შესაბამისი ფართომასშტაბიანი ინფრასტრუქტურული სამუშაოები.

დედოფლისწყაროს მუნიციპალიტეტის მერის, ნიკოლოზ ჯანიაშვილის განცხადებით, უახლოეს პერიოდში დაიწყება წყალმომარაგების გაუმჯობესების მიზნით დაგეგმილი ყველა პროექტი, რომელთა დასრულების შემდეგაც ქ. დედოფლისწყაროსა და მუნიციპალიტეტის ყველა სოფელს 24 საათიანი წყალმომარაგება ექნება.

„ესაა ისტორიული პერიოდი ჩვენი მუნიციპალიტეტისთვის, რადგან ვიწყებთ უმნიშვნელოვანესი პროექტების განხორციელებას, რომელთა დასრულების შემდეგაც ჩვენი მუნიციპალიტეტის ყველა სოფელს სასმელი წყალი უწყვეტ რეჟიმში მიეწოდება. ეს უკვე რეალობაა, რისთვისაც დიდ მადლობას მოვუხდი საქართველოს ცენტრალურ ხელისუფლებას, “ - აღნიშნავს ნიკოლოზ ჯანიაშვილი.

წელს დედოფლისწყაროს მუნიციპალიტეტის 24 საათიანი წყალმომარაგებისთვის 57 მილიონ ლარზე მეტი დაიხარჯება.