პოლონელი ფოტოგრაფი და მოგზაური მაცეი დაკოვიჩი უკვე რამდენიმე წელია მსოფლიოს გარშემო მოგზაურობს და სხვადასხვა ქვეყნის წარმომადგენელთა ყოველდღიურობას დეტალურად ეცნობა, რასაც თავის საკმაოდ ატმოსფერულ ფოტოებზეც აღბეჭდავს. საყვარელი ჰობისთვის, რომელიც მოგვიანებით მის მთავარ პროფესიად იქცა, მაცეიმ აკადემიურ კარიერაზეც კი უარი განაცხადა - ხელოვანი კომპიუტერული მეცნიერების დოქტორის ხარისხის მფლობელი გახლავთ. მისი ათასობით ფოტოკადრი, მსოფლიოს სხვადასხვა წერტილშია გადაღებული, რომელიც ქვეყნების კულტურულ ტრადიციებსა და საინტერესო ქუჩის სცენებს ასახავს, თუმცა ამჯერად, თქვენი ყურადღება მსურს შევაჩერო ფოტოხელოვანის ფოტოწიგნზე - "კარდიფი წყვდიადში", რომელიც მან უელსის დედაქალაქის ღამის ცხოვრებას მიუძღვნა. ჟურნალი" TIME"– ის მიხედვით მაცეი დაკოვიჩის ფოტოების ეს სერია 2012 წლის საუკეთესო წიგნების სიაშიც კი მოხვდა. კადრები უქმეებზეა გადაღებული, როდესაც ქალაქი თავის სამუშაო კვირას ასრულებს და სრულ თავდავიწყებას ეძლევა. მაშ ასე, მოდით ვნახოთ, თუ როგორ ერთობა და როგორ ატარებს თავისუფალ დროს კარდიფის ადგილობრივი მოსახლეობა.