საქართველოს თავდაცვის სამინისტროს სამხედრო პოლიციის დეპარტამენტის ყოფილი უფროსი მეგის ქარდავა „ევროპული საქართველოს“ ერთ-ერთი ლიდერის გიგი უგულავას მიერ „ტვ პირველის“ ეთერში გაკეთებულ განცხადებას ეხმაურება, რომლის მიხედვით მეგის ქარდავა საქართველოში არ დაბრუნდება და წარსული აღარ უნდა დაბრუნდეს.

.

მეგის ქარდავა უგულავას განცხადებას საკუთარ ფეისბუკ-გვერდზე გამოეხმაურა და აღნიშნა, რომ ის აუცილებლად დაბრუნდება საქართველოში. აღნიშნულ პოსტში ქარდავამ გიგი უგულავას ბიუჯეტის ვირთხა უწოდა.

.

„მინდა გამოვეხმაურო ტვ პირველის ეთერში გიგი უგულავას გაკეთებულ განცხადებას: „არავითარი მეგისი არსად აღარ დაბრუნდება, წერტილი უნდა დავუსვათ ამას, წარსული აღარ დაბრუნდება“. - არ ვიცი რა იგულისხმა უგულავამ, მაგრამ თუ ის გულისხმობს რაიმე თანამდებობაზე ჩემს დაბრუნებას, მინდა დავამშვიდო იგი და სხვებიც, რომ არანაირ თანამდებობაზე დაბრუნებას არ ვაპირებ და არც არანაირი სურვილი არ მაქვს, ხოლო რაც შეეხება საქართველოში დაბრუნებას, მე აუცილებლად დავბრუნდები, რადგან ვიყავი, ვარ და ვიქნები:„მუდამ საქართველოს ქომაგი!!!“

.

რა „საქმეებიც“ არუნდა „შეკერონ“ ჩემს მიმართ, ყველას მოტივი იქნება ერთი: „ქვეყნის ინტერესებიდან გამომდინარე", ვინაიდან სხვა მოტივი არც არასოდეს მქონია და არც მექნება. უგულავა კი, ყოველთვის „ბიუჯეტის ვირთხა" -დ დარჩება, რომელიც მზადაა ყველა გაწიროს საკუთარი „ტყავი"-ს გადასარჩენად“, - წერს ქარდავა.

.

მეგის ქარდავა სოციალურ ქსელში განცხადებებით ან რაიმე აქტივობებით სულაც არ გამოირჩევა. სოციალური ქსელ ფეისბუქის მის ამ აქაუნთზე არც ფოტოსურათებია განთავსებული და მხოლოდ ორი განცხადებაა გამოქვეყნებული. ერთი ზემოთხსენებული სტატუსი. მეორე კი რურუასთან და მთავარი არხის რეპორტაჟთან დაკავშირებული კრიტიკული სტატუსი, რომელიც ქარდავამ რამდენიმე თვის წინ დაწერა.

.

ცნობისთვის, 2017 წელს სააპელაციო სასამართლომ ყოფილ მაღალჩინოსანს მეგის ქარდავას სერგო თეთრაძის საქმეზე პატიმრობა მიუსაჯა. მას დაუსწრებლად ცხრა წლით თავისუფლების აღკვეთა შეეფარდა. სასამართლოს გადაწყვეტილებით, ის დამნაშავედ სცნეს 144-ე და 138-ე მუხლებით, რაც სექსუალური ხასიათის ძალმომრეობასა და წამებას გულისხმობს.

.

მეგის ქარდავას წინააღმდეგ სისხლის სამართლის 9 საქმეა აღძრული. აქედან შვიდი ადამიანების წამებას ეხება. მას ბრალი მკვლელობებშიც ედება. ქართული მხარის მოთხოვნით ინტერპოლის წითელი ცირკულარით ძებნილი მეგის ქარდავა პროკურატურის შუამდგომლობის საფუძველზე უკრაინაში 2017 წლის პირველ ნოემბერს დააკავეს.

/

2018 წლის 3 დეკემბერს უკრაინაში მეგის ქარდავას საექსტრადიციო პატიმრობა შინაპატიმრობით შეეცვალა. პროკურატურის განცხადებით, მეგის ქარდავა 11 სისხლის სამართლის საქმეზე ზოგ შემთხვევაში მსჯავრდებული, ზოგ შემთხვევაში კი ბრალდებულია.