ამრიგად ბეზოსი მსოფლიოს უმდიდრესი ადამიანია. მას ჟურნალ “ფორბსის” სიაში უკან დიდი ჩამორჩენით მიყვება “მაიკროსოფტის” ხელმძღვანელი ბილ გეითსი. გეითსის ქონება “სულ რაღაც” 123 მილიარდ დოლარს შეადგენს, ხოლო მესამე ადგილზე “ფეისბუკის” დამფუძნებელი მარკ ცუკერბერგია, რომელსაც 96 მილიარდი დოლარი აქვს.

და ეს ხდება ამერიკის შეერთებულ შტატებში - იმ ქვეყანაში, სადაც კორონავირუსის კრიზისის პირობებში 40 მილიონ ადამიანს არ შეუძლია, ბინის ქირა იხადოს, ჰქონდეს ჯანდაცვის პოლისი და იშოვოს ღირსეული სამუშაო. სწორედ ამ უმწვავესი კრიზისის დროს გაიზარდა ჯეფ ბეზოსის ქონება 44 მილიარდი დოლარით.

ნიშანდობლივია, რომ ბოლო წლების მანძილზე კომპანია “ამაზონს” აშშ-ში თითქმის არ აქვს გადახდილი არავითარი გადასახადები.

შესაძლოა, ბევრი ვერც კი აცნობიერებდეს, თუ რამდენია 204 მილიარდი დოლარი. ამხელა თანხის კი არა, 1 მილიარდი დოლარის წარმოდგენაც კი ნებისმიერი ნორმალური ადამიანის ფანტაზიას გაუჭირდება. უბრალოდ გეტყვით, რომ ამ უზარმაზარი კაპიტალის სულ რაღაც ერთი მეათასედი ნაწილიც კი საკმარისია, რათა სამუდამოდ გადაგვეჭრა უბინაობის პრობლემა საქართველოში.

204 მილიარდი დოლარი საქართველოს მოქალაქეებისთვის რომ დაგვერიგებინა, თითოეული ჩვენთაგანი 1, 69 მილიონ ლარზე მეტს მიიღებდა. აი, ამხელა თანხაა 204 მილიარდი დოლარი.

ჯეფ ბეზოსს ახლა 204 კი არა, 268 მილიარდი დოლარიც კი ექნებოდა, მის ცოლს, მაკენზი ბეზოსს მისთვის თავი რომ არ დაენებებინა და გაყრის შედეგად 64 მილიარდი დოლარი რომ არ წაეღო.

საინტერესოა, რომ მთლიანად კორონავირუსის პანდემიის დაწყებიდან დღემდე უმდიდრესი ამერიკელების კაპიტალი 565 მილიარდი დოლარით არის გაზრდილი და კვლავაც გასაოცრად სწრაფად განაგრძობს ზრდას მსოფლიოს მოსახლეობის არანაკლებ სწრაფი გაღატაკების პარალელურად.