აშკარაა, რომ ამერიკელები იარაღს კორონავირუსის გლობალურ პანდემიასთან დაკავშირებით იმარაგებენ.

ამ მხრივ განსაკუთრებული აქტიურობით ის შტატები და რეგიონები გამოირჩევა, სადაც Covid-19-ის ყველაზე მეტი შემთხვევები დაფიქსირდა. ესენია ვაშინგტონი, კალიფორნია და ნიუ-იორკი, სადაც იარაღის გაყიდვებმა იმხელა მაჩვენებელი შეადგინა, რომ ექსპერტები შიშობენ, რომ ამ ყველაფერს საზოგადოებრივი წესრიგის მასობრივი ჩამოშლა შეიძლება მოჰყვეს შედეგად.

მდგომარეობა განსაკუთრებით დრამატულია იმის გათვალისწინებით, რომ იარაღის საყიდლად რიგებში ჩადგნენ ის ადამიანებიც, რომლებსაც საბრძოლო აღჭურვილობა აქამდე არასოდეს შეუძენიათ ან რომლებიც, სულაც, მხარს უჭერდნენ ცეცხლსასროლი იარაღის ტარების შეზღუდვას, რაც ამერიკის შეერთებული შტატების კონსტიტუციით თითოეული მოქალაქისთვის გარანტირებული უფლებაა.

აღსანიშნავია, რომ იარაღის გარდა მთელი მსოფლიოს მასშტაბით რეკორდულ ნიშნულებს აღწევს ტუალეტის ქაღალდის გაყიდვები.

კორონავირუსთან ბრძოლა ტუალეტის ქაღალდით და ცეცხლსასროლი იარაღით – ეს თანამედროვე სამყაროს ის ტრაგიკომიკური ტრენდია, რომლის არსსაც მოაზროვნე ადამიანი ალბათ ვერასოდეს ჩაწვდება.