ისეთი ალკოჰოლური სასმელი, როგორიცაა შამპანური, იქნება ეს ფრანგული თუ ქართული, ძირითადად სადღესასწაულო და განსაკუთრებული მოვლენების აღსანიშნავად იხსნება, თუმცა, ცოტამ თუ იცის მისი სამკურნალო თვისებების შესახებ და შესაბამისად, ამ მიზნით ნამდვილად არ იღებს. შამპანურის სამკურნალო დანიშნულებით გამოყენებას, საკმაოდ ხანგრძლივი ისტორია აქვს. სხვათა შორის, მას დილაობით მხოლოდ არისტოკრატები არ სვამენ.

შამპანური მეხსიერების გასაუმჯობესებლად

ადრე ითვლებოდა, რომ კვირაში 3 ბოკალი შამპანური კოგნიტური ფუნქციების დაქვეითებას იწვევს. თუმცა, ამ საკითხით დაინტერესდნენ მკვლევარები, ჩაატარეს სამეცნიერო ექსპერიმენტები და შედეგად დაადგინეს, რომ წითელი ყურძნის ჯიშებში – პინო ნუარსა და პინო მენიეში შემავალ ნივთიერებას მეხსიერების გაუმჯობესების უნარი გააჩნია. აღნიშნულ ექსპერიმენტებს ვირთხებზე ატარებდნენ.

შამპანური სამკურნალო მიზნით: არცთუ დიდი ხნის წინ გამოქვეყნდა ერთი კვლევის შედეგები, რომელმაც ცალსახად და მკაფიოდ აჩვენა, რომ შამპანურის ზომიერად მოხმარებას ადამიანის კოგნიტურ ფუნქციებზე, უშუალოდ მეხსიერებაზე, პოზიტიური გავლენის მოხდენის უნარი გააჩნია. აღნიშნული ექსპერიმენტის თანაავტორი მეცნიერებათა დოქტორი ჯერემი სპენსერია. ის ხელმძღვანელობს მეცნიერთა ჯგუფს რედინგის უნივერსიტეტში (დიდი ბრიტანეთი). კოლეგებთან ერთად მკვლევარმა დაადგინა, რომ კვირაში 2 ბოკალი შამპანური პოზიტიურ გავლენას ახდენს სისხლძარღვების კედლებზე, ამცირებს ინსულტის რისკს, ისევე როგორც გულ-სისხლძარღვთა დაავადებების განვითარების ალბათობას.

თავისთავად შამპანური ჯანსაღი ალკოჰოლური სასმელია, რომლის მოქმედება ადამიანის ორგანიზმზე (ტვინის უჯრედებზე) შეიძლება შევადაროთ ღვინოს. კვლევამ დაადგინა, რომ შამპანურს, რომელიც არ შეიცავს ფლავონოიდებს, ასევე უნარი აქვს დადებითი გავლენა მოახდინოს ტვინის მუშაობაზე ფენოლური ნაერთების მოქმედების ხარჯზე. ეს უკანასკნელი კი უდიდეს როლს თამაშობს ნივთიერებათა ცვლის პროცესში, რამდენადაც ბიოლოგიურად აქტიურ ნივთიერებას წარმოადგენს.

სპენსერი და მისი მკვლევართა ჯგუფი გვირჩევენ ალკოჰოლური სასმელის ზომიერად მიღებას. მათი კვლევის შედეგები კი იმაზე მეტყველებს, რომ კვირაში ერთი-ორი ჭიქა შაპანური პოზიტიურად ზემოქმედებს ადამიანის კოგნიტურ ფუნქციებზე.

ამასთან, შამპანურს, გარდა იმისა რომ აუმჯობესებს მეხსიერებას, გააჩნია სხვა უპირატესობებიც. სასმელი შეიცავს დიდი რაოდენობით ანტიოქსიდანტებს, რომელიც აუცილებელია კანისთვის. ასევე, ეს დაბალკალორიული სასმელია, რომელიც არ აძლევს ქოლესტერინს სისხლძარღვების კედლებზე დალექვის საშუალებას, აუმჯობესებს საჭმლის მონელებას, აფერხებს სიბერის პროცესს, ამცირებს ინსულტის განვითარების რისკს, უჯრედებს ჟანგბადით ამდიდრებს, არტერიული წნევის ნორმალიზებას ახდენს. მცნიერები განსაკუთრებით აღნიშნავენ, რომ ადამიანის ორგანიზმისთვის სარგებლის მოტანა მხოლოდ ძვირფას ფრანგულ შამპანურს არ შეუძლია, ეფექტურია ასევე შედარებით იაფი ცქრიალა ღვინოც.

გახსოვდეთ, რომ ნებისმიერი ალკოჰოლური სასმლის, მათ შორის შამპანურის, ჭარბი რაოდენობით მოხმარება ჯანმრთელობისთვის დიდ საფრთხეს წარმოადგენს და სრულიად ანეიტრალებს მის სამკურნალო ღირებულებებს!