ხორავას ქუჩაზე მოკლული დათუნა სარალიძის მამა, ზაზა სარალიძე ბოლო ზართან დაკავშირებით პოსტს აქვეყნებს.

როგორც ზაზა სარალიძის პოსტიდან ირკვევა დღეს დათუნას ბოლო ზარი უნდა ჰქონოდა და სკოლა დაემთავრებინა.

"დღეს 2019 წლის 20 მაისს შენი კლასი და სკოლა ბოლო ზარს ზეიმობს!!!

არ შემდგარ სკოლის დამთავრებას გილოცავ მამი იმიერ საქართველოში!!!"- წერს სარალიძე და შვილის ფოტოს აქვეყნებს.

2017 წლის პირველ დეკემბერს თბილისში, ხორავას ქუჩაზე, ერთ-ერთ ეზოში, მოზარდებს შორის დაწყებული შელაპარაკება ჩხუბში გადაიზარდა, რა დროსაც მოზარდების ნაწილმა ცივი იარაღი გამოიყენა.

დაპირისპირების შედეგად გარდაიცვალნენ დათუნა სარალიძე და ლევან დადუნაშვილი. სარალიძეს 12 ჭრილობა მუცლის, გულმკერდისა და ბარძაყის არეში ჰქონდა მიყენებული.

საქმის გამოძიება ბოლომდე დღემდე არ არის დასრულებული და ზაზა სარალიძე ამბობს, რომ მისი შვილის მკვლელები დასჯილები არ არიან.

ორი მოზარდის მკვლელობის საქმე ახლა თბილისის სააპელაციო სასამართლოში დასკვნით ეტაპზეა.

როგორც დღეს გავრცელდა ინფორმაცია დათუნას და ლევანის კლასელებმა ბოლო ზარი გარდაცვლილი კლასელების საფლავზე აღნიშნეს.