უჩვეულო შემთხვევა მოხდა ბოტსვანაში. ძუ ლომმა ბაბუინი მოკლა, მაგრამ მის შვილს პირი არ დააკარა. ამ ფაქტის შემსწრე ტურისტების ჯგუფი იყო და მათ შორის, ველური ბუნების მოყვარული ფოტოგრაფები, რომლებმაც ეს ფაქტი ფოტოებზე ასახეს:

როგორც ფოტოგრაფები - ევან შილერი და ლიზა ჰოლცვარი ჰყვებიან, მტაცებელი 30-40 მამიუნისგან შემდგარ, ბაბუინების ჯგუფს უთვალთვალებდა. ერთ მდედრ მაიმუნს არ გაუმართლა და ლომის კლანჭებში აღმოჩნდა. ამის ნახვის შემდეგ, მოგზაურები გზას გააგრძელებდნენ, რომ არა პატარა ბაბუინი, რომელიც მსხვერპლზე იყო ჩაბღაუჭებული და უკვე მკვდარ დედას არ სცილდებოდა.

იმ მომენტში, როდესაც ლომმა ნადავლის უსაფრთხო ადგილზე (მოფარებულში) გადატანა გადაწყვიტა, პატარა დედას მოშორდა და ხისკენ გაიქცა, რითაც ლომის ყურადღება მიიქცია.

რადგან ის მეტისმეტად პატარა იყო საიმისოდ, რომ ხეზე ამძვრალიყო, ფოტოგრაფები სისხლისღვრას ელოდნენ. მაგრამ, მათი მოლოდინი არ გამართლდა: ცნობისმოყვარე მტაცებელი ხესთან მივიდა და პატარასთან თამაში დაიწყო.

მოვიდნენ სხვა ძუ ლომებიც, რომლებიც დიდი ინტერესით ათვალიერებდნენ პატარა ბაბუინს. არანაირი აგრესია, სხვა ლომების მხრიდან არ ყოფილა, ვიდრე იქ ხვადი ლომი არ გამოჩნდა. როდესაც მან ბაბუინის წართმევა მოინდომა, ძუ ლომებმა მაიმუნი დაიცვეს და შეუტიეს მას.

ყოველივე ამას, მეზობელი ხიდან, ზრდასრული ბაბუინები აკვირდებოდნენ. მათგან, ერთ-ერთმა შემთხვევით ისარგებლა, მიწაზე ჩამოსვლა შეძლო და პატარა ბაბუინი თან წაიყვანა.

რა დაემართა შემდეგ პატარა ნაშიერს, რთული სათქმელია, მაგრამ იმ დღეს, ის ნამდვილად გადაურჩა სიკვდილს.

ამ ისტორიამ კი დაგვანახვა, რომ პატარები, ცხოველთა სამყაროშიც კი, კანონის მიღმა არიან.