მუსიკოსმა პოლ მაკარტნიმ ლოს-ანჯელესში ახალი კლიპი წარადგინა. მასში ჰოლივუდის ვარსკვლავები - ნატალი პორტმანი და ჯონი დეპი მონაწილეობენ. კლიპის "My Valentine" რეჟისორი თავად მაკარტნია. პრესისთვის მიცემულ ინტერვიუში მაკარტნიმ განაცხადა, რომ თავს კარგად გრძნობს და კლიპზე მუშაობა ძალიან მოეწონა მიუხედავად იმისა, რომ გადაღების დროს გარკვეული შეცდომები იყო დაშვებული. ვიდეორგოლში ჯონი დეპი და ნატალი პორტმანი ჟესტების ენით ხსნიან სიმღერის ტექსტს, თუმცა აღმოჩნდა, რომ მათი ჟესტების ენა სულ სხვა შინაარსის ტექსტს გამოხატავს. ამის შესახებ სმენადაქვეითებული მსმენელები აცხადებენ. მათი თქმით, ნატალი პორტმანმა ერთ-ერთი ნიშნით სიტყვა "ტამპონი" გამოსახა, ხოლო ჯონი დეპმა ვალენტინი "მტრით" ჩაანაცვლა.
"არაჩვეულებრივია, როდესაც ისეთი ადამიანები, როგორიც არიან ჯონი დეპი და ნატალი პორტმანი, ჟესტების ენით საუბრობენ, მაგრამ ალბათ უკეთესი იქნებოდა, რომ ვიდეოში მონაწილეობა რეალურად ყრუ-მუნჯ ადამიანებს მიეღოთ. თუმცა, ეს ვიდეო ნამდვილად არაჩვეულებრივია", - განაცხადა ბრიტანეთის ყრუ-მუნჯთა ასოციაციის წარმომადგენელმა.