განადგურებული მოსავალი, ძირფესვიანად მოგლეჯილი ხეები, ქარისგან მომტვრეული რკინა-ბეტონის ბოძები და ახდილი სახურავები.

მსგავსი მასშტაბების სტიქია, რაც 19 ივლისს კახეთის რეგიონში მოხდა, გურჯაანისა და თელავის რაიონში მცხოვრებ უხუცესებსაც არ ახსოვთ.

მოსახლეობა იხსენებს, რომ ქარიშხალს და სეტყვას მიწისძვრის მსგავსი რყევები და აუტანელი ხმაური ახლდა. ქარიშხალს თელავში ვერცერთი ხე საღად ვერ გადაურჩა. ბევრი მათგანი ძირფესვიანად არის მოგლეჯილი. ქარისგან გადატეხილი განათების ბოძების ნახვის შემდეგ უფრო ცხადად წარმოსადგენია, რა ხდებოდა თელავში 19 ივლისს, გამთენიისას.

სტიქიამ მნიშვნელოვნად დააზარალა გურჯაანის რაიონიც. ახდილი სახურავები და კვერცხის ზომის სეტყვით ჩამტვრეული მინები გურჯაანის სოფლებშიც ყველა ნაბიჯზე შეგხვდებათ, თუმცა, როგორც ადგილობრივები აცხადებენ, ეს ზარალი უმნიშვნელოა იმასთან შედარებით, რაც მათ მოსავალს მიადგა.

გარდა იმისა, რომ შემოსავლის წყაროს გარეშე დარჩნენ, კახელებს ყველაზე მეტად ის აღელვებთ, რომ ბანკიდან აღებული კრედიტები მძიმე ტვირთად დააწვებათ. როგორც გურჯაანელი გლეხები აცხადებენ, მათი 90-პროცენტი ვენახებსა და ხეხილს სესხით უვლიდა.