თბილისში, ზესტაფონის ქუჩაზე გვიან ღამით ხმაური იყო. ადგილობრივი მცხოვრებლები სასულიერო პირს საცხოვრებელ კორპუსში შესვლის შესაძლებლობას არ აძლევდნენ.

მეზობლებსა და მრევლს შორის რამდენჯერმე სიტყვიერი დაპირისპირებაც მოხდა. მოსახლეობის განცხადებით, მამა ნიკოლოზი მათ პერიოდულად თავს ესხმის და სიტყვიერ და ფიზიკურ შეურაცხყოფას აყენებს.

ადგილზე შეკრებილი იყვნენ სასულიერო პირის მრევლის წევრები. ზესტაფონის ქუჩაზე ასევე, კიდევ ერთი სასულიერო პირი მივიდა.

მათი თქმით, მამა ნიკოლოზი განდეგილი ბერია და მოსახლეობისგან სასულიერო პირის მიმართ წაყენებული ბრალდებები რეალობას არ შეესაბამება.

თავად მამა ნიკოლოზი მედიასთან კომენტარს არ აკეთებს. ადგილზე მობილიზებული იყვნენ სამართალდამცველები.

არსებული ინფორმაციით, სასულიერო პირს მღვდელმსახურების უფლება 15 წლის წინ შეუჩერდა.