ქმრისა და შვილის მკვლელობაში ბრალდებულს სასამართლომ აღმკვეთი ღონისძიება შეუფარდა. მაგდა პაპიძე დანაშაულს არ აღიარებს და სამართალდამცველებს ფიზიკურ ზეწოლაში ადანაშაულებს. მისი თქმით, დაკავების შემდეგ მას პოლიციელები გაუსწორდნენ და დაუპატიურებით დაემუქრნენ. მოსამართლემ კი პროკურატურას ამ ფაქტით დაინტერესებისკენ მოუწოდა. პაპიძე ამბობს, რომ მისი ქმარი პათოლოგი იყო და სხვა მამაკაცი შეუყვარდა.

პროკურორები კი განმარტავენ, რომ არსებობს ყველა მტკიცებულება რომ მაგდა პაპიძემ ორმაგი მკვლელობა ჩაიდინა. პროკურატურაში აცხადებენ, რომ არსებობს ვიდეო კადრები როგორ ყრის პაპიძე სისხლიან ტილოებს. საგამოძიებო ორგანოების ინფორმაციით პაპიძის წინააღმდეგ ჩვენება მისმა მეგობარმა მამაკაცმა და ოჯახის წევრებმა მისცეს. ამასთან პროკურატურა ამტკიცებს, რომ პაპიძემ 5 წლის ბავშვი მოკლა, მკვლელობის შემდეგ კი სახლიდან ბავშვის სურათები გადაყარა.

მაგდა პაპიძე აცხადებს, რომ მან მეუღლე და ბავშვი სადარბაზოში ნახა და თავიდან წაქცეული 27 წლის მამაკაცი ნასვამი ეგონა, რის შემდეგაც მან სავარაუდოდ მკვლელობის იარაღი ჩაქუჩი გადააგდო. თუმცა პროკურატურის წარმომადგენლები აცხადებენ, რომ სისხლის კვალი სახლშიც არის აღმოჩენილი.