შინაგან საქმეთა სამინისტრო პოლიციელების მკვლელობაში ბრალდებული შალვა აბულაძის დაკავებას ადასტურებს. შსს-მ ბრალდებულის აყვანის ოპერაციის კადრები უკვე გაავრცელა. შსს-ს ინფორმაციით, შალვა აბულაძე ბორჯომის რაიონში ჩატარებული სპეციალური ოპერაციის შედეგად აიყვანეს. ძებნილი თბილისში ვერტმფრენით გადმოიყვანეს და სპეციალური ესკორტით შინაგან საქმეთა სამინისტროს ორთაჭალის შენობაში გადაიყვანეს.

შალვა აბულაძეს ბრალად ედება ორი პოლიციელის მკვლელობა. თავდასხმის ბოლო შემთხვევა 4 აპრილს თბილისში მოხდა. ვარკეთილში ის ორმა პოლიციელმა გადამოწმების მიზნით გააჩერა, რა დროსაც აბულაძემ ცეცხლი გახსნა. შედეგად დაიღუპა პოლიციელი ბექა მარგიშვილი. დაიჭრა მეორე პოლიციელი ვალერიან გრძელიშვილი.