გამოქვეყნდა ახალი კომედიის, "შეფ-მზარეულის" (Chef) თრეილერი, რომელიც მაყურებლის ინტერესს პირველ რიგში მსახიობების შემადგენლობით იპყრობს. მთავარი როლის შემსრულებელ ჯონ ფავროს (რომელიც ასევე ფილმის რეჟისორი და სცენარისტია) პარტნიორობას სკარლეტ იოჰანსონი, სოფია ვერგარა, რობერტ დაუნი უმცროსი, ჯონ ლეგუიზამო და დასტინ ჰოფმანი უწევენ.

კრიტიკოსების თქმით, "უმჯობესია ფილმი მშიერ კუჭზე არ ნახოთ", რადგან საკვები ფავროს სურათის მთავარი თემაა და კადრში დიდი რაოდენობის მადისამღძვრელი კერძია წარმოდგენილი

სიუჟეტის ცენტრში მზარეული კარლ კასპერია, რომელსაც ლოს-ანჯელესის ძვირადღირებული რესტორნიდან წამოსვლა დაწესებულების მფლობელთან კონფლიქტის გამო უწევს.

მთავარი გმირი მაიამიში მიემგზავრება, სადაც ბორბლებიანი სასადილოების ქსელის გახსნას გადაწყვეტს. მზარეულის ჩანაფიქრს მხარს მისი ყოფილი მეუღლე (ვერგარა) და მეგობარი (ლეგუიზამო) უჭრენ. ახალი ბიზნესის გახსნასთან ერთად, კარლი მისი კულინარიული ნიჭის განვითარებასა და ოჯახთან ურთიერთობების დალაგებას ცდილობს.