საშინელი ავარიით დასრულდა ფლორიდის შტატის ქალაქ დაიტონაში NASCAR-ის სერიის რბოლა. სხვადასხვა სიმძიმის ტრავმა მიიღო 28 მაყურებელმა.

ავტოკატასტროფა ტრასაზე რამდენიმე ავტომობილის შეჯახების შემდეგ მოხდა. ერთ-ერთი მანქანა, რომლის საჭესთან დებიუტანტი კაილ ლარსონი იჯდა, ჰაერში აფრინდა და ტრიბუნების დამცავ ღობეს შეასკდა. დარტყმამ მანქანის წინა მხარე მთლიანად გაანადგურა, ავტოს ნაწილები კი ტრასაზე და მაყურებლებს შორის მიმოფანტა.

23 თებერვალს ჩატარებული ეტაპის გამარჯვებული გახდა ტონი სტიუარტი, რომელმაც მოახერხა დამსხვრეულ მანქანებს შორის გავლა და პირველმა გადაკვეთა ფინიშის ხაზი. სტიუარტმა, რომელიც NASCAR-ის სერიის სამგზის გამარჯვებულია, ფინიშის შემდეგ უარი თქვა დაჯილდოების ტრადიციულ ცერემონიაში მონაწილეობაზე.