ორიოდე თვის წინ ინგა გრიგოლიას საავტორო გადაცემა "რეაქცია" დახურეს და ჟურნალისტი არხიდანაც გამოუშვეს. მომხდარს დიდი სკანდალი მოჰყვა. ამ ყველაფერს თავად ინგა ასე აფასებდა: "ვერასოდეს ვერ დავიჯერებ, რომ ეს არ იყო პოლიტიკური გადაწყვეტილება. არ არის გამორიცხული, რომ ბიძინა ივანიშვილის მიერ მიღებული გადაწყვეტილებაა რადგან ფაქტია, რომ ეს არის პოლიტიკური გადაწყვეტილება, ფაქტია, რომ ამ გადაწყვეტილებებს ამ ქვეყანაში იღებს ერთი კაცი, რომელსაც აქვს თავისი სწორება როგორი უნდა იყოს მედია, ის აწესებს მედიასტანდარტებს, მას აქვს მოსაზრებები ხვდებოდა ჟურნალისტებს, ექსპერტებს. არ არის გამორიცხული, რომ მისი მოსაზრება იყო. ხელისუფლება ყოველთვის ეცდება, რომ გაგვაკონტროლოს, ცუდი ისაა თუ ტელევიზიის მფლობელები ხელისუფლებას გაუგორებენ კოჭს. ჩემს შემთხვევაში ეს ასე მოხდა."

ჟურნალისტმა რამდენიმე თვე დასვენებასა და პირად ცხოვრებას დაუთმო, თუმცა კარიერის დასრულებაზე არც უფიქრია. ინგამ სოციალური ქსელის მეშვეობით გვამცნო, რომ მაყურებელს უბრუნდება. "დავამთავრე უსაქმურობის პერიოდი... წყენებისგან, გაბრაზებისგან, უსამართლობის ემოციებისგან სრულიად სტერილური ვარ უკვე და მივხვდი, რომ აქტიურობის დრო დადგა. (პრინციპში, ორ თვეზე მეტ ხანს არც არასდროს გაგრძელებულა ჩემი უსაქმურობა და გაბრაზებები) ხოდა, ბევრი რომ არ მივედ-მოვედო, გადავწყვიტე, კიდევ ერთხელ ახლიდან დავიწყო ყველაფერი...მიყვარს ჩემი ცხოვრება, ყოველ ორ-სამ წელიწადში ერთხელ ხელახლა რომ ვიწყებ"-წერს ინგა. რა ფორმით და რომელ არხზე გავა ინგას გადაცემა ჯერ უცნობია, თუმცა წინ ცხარე ეთერი და კარგი სანახაობა გველის...