უკრაინის უმაღლესი რადას დეპუტატი ბორის ფილატოვი ოდესის გუბერნატორს მიხეილ სააკაშვილს შეურაცხყოფისათვის სასამართლოთი ემუქრება. ამის შესახებ ბორის ფილატოვი სოციალურ ქსელში წერს:

„შენ პასუხს აგებ იმაზე, რომ მე ბანდიტი მიწოდე. მე კონკრეტულ ფაქტებს მოვიყვან. ყველას მოვუყვები, რატომ გაგაგდეს საკუთარი ქვეყნიდან – ეს მოხდა ტელეკომპანია „იმედის“ დარბევისთვის, გაუპატიურებული პატიმრებისთვის და შენი გატაცების გამო ფსიქოტროპული საშუალებებით, რომლებიც გონებას აღაგზნებს“, – წერს ფილატოვი.

შეგახსენებთ, რომ რამოდენიმე დღის წინ უკრაინულ მედიაში გავრცელდა ვიდეომასალა, სადაც ასახული იყო უკრაინის სახალხო დეპუტატის ბორის ფილატოვისა და ოდესის ოლქის გუბერნატორის მიხეილ სააკაშვილის შელაპარაკება. შემთხვევა ჩერნიგოვში, უზენაესი რადას შუალედური არჩევნების დაწყების ფონზე მოხდა. ფილატოვი თავდაპირველად "პეტრო პოროშენკოს ბლოკის" დეპუტატობის კანდიდატს სერგეი ბერეზენკოს დაუპირისპირდა და ამომრჩევლების მოსყიდვასა და მათთვის ფულის დარიგებაში დაადანაშაულა, შემდეგ კი მიხეილ სააკაშვილს გადასწვდა და მას პოლიტიკური კაპიტალის განიავებაში დასდო ბრალი.

გაღიზიანებულმა მიხეილ სააკაშვილმა, თავის მხრივ, ფილატოვს რეკეტიორი, მარადიორი და გაბღენძილი ნაძირალა უწოდა.