თბილისში მომხდარ სტიქიურ უბედურებას დები, ინდირა და ლიზა ზარანდიები ემსხვერპლნენ. ინდირა 22 წლის იყო და რადიო "საქართველოს ხმაში" მუშაობდა, 25 წლის ლიზა კი პროფესიით სტომტოლოგი გახლდათ. დები წარმოშობით სამეგრელოდან იყვნენ, ამჟამად კი მშობლებთან ერთად საბურთალოზე, ნაქირავებ ბინაში ცხოვრობდნენ. გოგონები უკვე დაკრძალეს, თუმცა ბევრ ადამიანს მათი არყოფნით გამოწვეული იარა მოუშუშებელი დარჩა. დების მეგობარი ჯაბა თოლორდვა სოციალურ ქსელში სულისშემძვრელ წერილს ავრცელებს: "როგორც ყოველთვის წუხელაც ამოვედით თქვენს საფლავზე, ვზივართ ყველა, ჩვენი ქუჩის ახალგაზრდები და ვლაპარაკობთ თქვენზე, სახლში ვერ ვჩერდებით ვერცერთი... საფლავზე ყოფნით თითქოს თავს ვიმშვიდებთ, ვიხსენებთ ბავშვობას. თქვენ გაგვაერთიანეთ გოგოებო, ახალგაზრდები თქვენზე და სიკვდილზე ფიქრით გაგვაერთიანეთ…. ყველას ერთი კითხვა გვაქვს!!! რატომ??? თქვენ ხომ ამას არ იმსახურებდით…

გადის დრო და თითქოს ვეგუებით ამ რეალობას, მხოლოდ თქვენი არყოფნის რეალობას, მაგრამ ჩვენს გულებში მუდამ იცოცხლებთ… მუდამ პატარა ლიზი და ინდი იქნებით ჩვენთვის… ნათელში განისვენეთ გოგოებო ძალიან გვენატრებით ყველას..."

ინდირა შეყვარებული გახლდათ იაკლი ჟორჟოლიანზე. ერთმანეთი სოცალური ქსელის მეშვეობით გაიცვნეს. წყვილს საერთო ანაბარი ჰქონდა გახსნილი და ქორწილისთვის ფულს აგროვებდა. "ყველამ, ვინც მე მიცნობს იცის, რომ ცხოვრებაში არ დამიპოსტავს. ახლა ალბათ იმიტომ, რომ ემოციებისგან ცოტათი მაინც დავიცალო და ყველას დაგანახოთ ჩემი თვალით დანახული ინდირა, რადგან ინდირა მხოლოდ ჩემთან იყო ისეთი ინდირა, როგორი ირაკლიც ვიყავი მე მხოლოდ მასთან. ინდირა იყო ზე ადამიანი, ყველაზე კეთილი, მზრუნველი, თბილი და მოსიყვარულე. ყოველდღე ცდილობდა ყველა და ყველაფერი უკეთესობისკენ შეეცვალა. საოცარი ცხოვრების ნიჭით იყო დაჯილდოებული. პირადად ჩემთვის ინდირა იყო იმედი, სიყვარული, ფიქრი, ოცნება - მოკლედ, ყველა ის გრძნობა, რაც ადამიანს ადამიანად ხდის და ეს ყველაფერი 14 ივნისის საბედისწერო ღვარცოფმა გაატანა წყალს ჩემს ინდირასთან ერთად. ამ დღის მერე მეც გვამი ვარ, უფრო სწორად მოსიარულე გვამი... მაგრამ დარწმუნებული ვარ, ჩვენ ისევ შევხვდებით სხვა ცხოვრებაში, რადგან შეუძლებელია ადამიანმა თავის სულის ნაწილს ვერ მიაგნოს. შენ კი ჩემი სრულფასოვანი ნახევარი იყავი, მართალია ამ ცხოვრებაში 21 წელი დამჭირდა შენს საპოვნელად და სულ რაღაც წელიწადსა და სამ თვეში დაგკარგე, თუმცა წინ ბევრი სხვა ცხოვრება გვაქვს. მიყვარხარ და მეყვარები ჩემო პატარა"-ამ სიტყვებით დაემშვიდობა ირაკლი ინდირას.

რაც შეეხება ლიზას, ის სერგო კაპანაძეს ხვდებოდა. ურთიერთობა ახალი დაწყებული ჰქონდათ, სტიქიის ღამესაც ერთად იმყოფებოდნენ.