მისი ფოტოები სხვისაში არასდროს აგერევა. ყველა მათგანი ძალიან ნაზი, ქალური და ფერადია. ეს არაა უბრალოდ ლამაზი სურათები, ეს მთელი ისტორიაა. ყველა მათგანი რაღაცას გიყვება და რაღაცისაკენ გიბიძგებს. თითქოს მოგიწოდებს, მას მიემსგავსო, მასავით თავისუფალი გახდე. გამოფენაზე, ნამუშევრების დათვალიერებისას, ჩნდება სურვილი, დაივიწყო ყველა და ყველაფერი, გახსოვდეს მხოლოდ საკუთარი სხეული და სულში ჩაგუბებულ ემოციებს გასაქანი მისცე.

თავადაც ქალია, თავისი ფოტოებივით ფერადი და საინტერესო. მგონია, ყველა სურათი მას ჰგავს. ყველა მოდელის თვალებიდან ავტორის ხასიათი გამოსჭვივის. მისი ფოტოები სტერეოტიპების დარღვევას ცდილობენ, საზოგადოებაში ახალებური ხედვა შემოაქვთ.