პირველი სიყვარული
განდეგილივით მარტოობას
ვეღარ გაუძლებ,
გულის სიღრმეში
უცნაური სითბო მაუწყებს.
უეცრად გრძნობამ დამაბნია,
ჯერ ვერ გავუგე,
გაზაფხულია,
ხმა ჩამესმის,
კარი გაუღე...


ვერ ვეუარე,
ვერ შევძელი გაჯიუტება,
მჩქეფარე სისხლი სიყვარულის
უცბად დუღდება...
ნატვრა ტრფობისა ძლიერდება,
აღარ მეშვება;
გული იწრთობა,
სიყვარული ცრემლით არ ქრება...
საამურია
გახსენება ტრფობის დღეების,
პირველი გრძნობის
ტანჯვისა და ბედნიერების...