საზოგადოება
"ნაცების დროს ნაცების მაჩალკამ და ქოცების დროს ქოცების მაჩალკამ თქვა... "– ვისზე საუბრობს ბექა ყორშია
2023, 6 აგვისტო, 18:20
ჟურნალისტი ბექა ყორშია ფილოლოგიის და მეცნიერებათა დოქტორის გია მურღულიას შოვის საზარელ ტრაგედასთან დაკავშირებით გამოქვეყნებული პოსტის გამო აკრიტიკებს და წერს:
"ნაცების დროს ნაცების მაჩალკამ და ქოცების დროს ქოცების მაჩალკამ, გია მურღულიამ თქვა, გლოვას დუმილი უხდება და ბევრს ნუ ლაპარაკობთო. ასეთ ხალხზე აქვს დაწერილი ტარიელ ჭანტურიას ეს სკაბრეზი:
ჯანსუღთან ჯანსუღელი ხარ
ბერულავასთან ხუტელი
შენ კარგი კაცი არა ხარ."- წერს ჟურნალისტი სოციალურ ქსელში.
შეგახსენებთ, რომ ბექა ყორშიას სტატუსი გია მურღულიას ამ პოსტს მოჰყვა:
"ვაჟა-ფშაველა წერს “სტუმარ-მასპინძელში”:
“სიკვდილსა გლოვა უხდება,
მკვდარ ძმას – ტირილი დისაო,
ტყესა – ხარ-ირმის ნაფრენი,
ზოგ დროს – ყმუილი მგლისაო…”
ერთი ფიქრი ასეთიც შეიძლება იყოს:
სტუმრები ჩვენ ვართ, ადამიანები, მასპინძელი კი წუთისოფელია, რომელიც მუდმივად გვასწავლის, რას რა უხდება, მაგრამ ამას ხან ვსწავლობთ, ხან – ვერა.
ცხოვრებას უყვარს შესატყვისობის პრინციპი, თორემ უადგილო ადგილას თუნდაც მართებულ ლაპარაკსა თუ ქცევას რა მძაფრი შედეგები მოსდევს, ვისაც არ ახსოვს, შეუძლია ქართული ზღაპარი “მუჭა-ნახევარა” გადაიკითხოს.
“ზოგ დროს – ყმუილი მგლისაო".
მოგვიანებით როგორც ბექა ყორშიამ აღნიშნა მურღულიამ ზემოაღნიშნული პოსტი მალევე წაშალა:
"გია მურღულიას წაუშლია თავისი სამარხცინო პოსტი, რომელშიც სიჩუმისკენ მოუწოდებდა საზოგადოებას. აქაც ჩანს, როგორი კონფორმისტია.
ასეთებმა უნდა გაიაზრონ, რომ ვითომ ინტელექტუალურ საბურველში გახვეული მავნებლური იდეების პროპაგანდირება არ ეპატიებათ"- დაწერა ყორშიამ.
შეგახსენებთ, რომ 3 აგვისტოს, კურორტ შოვში, მათ შორის სასტუმრო "სანსეტ შოვთან" მეწყერი ჩამოწვა. ადიდებულმა მდინარემ წაიღო სამანქანო ხიდი. მოსახლეობის დასახმარებლად ადგილზე ჩაფრინდა სასაზღვრო პოლიციის 2 სამაშველო ვერტმფრენი. სამაშველო ღონისძიებები ამ დრომდე გრძელდება. ოფიციალური ინფორმაციით, სტიქიას 18 ადამიანის სიცოცხლე ემსხვერპლა. სტიქიის ზონიდან, ჯამში 210 ადამიანია გამოყვანილი.
