.

„საქართველოს მწვანეები – დედამიწის მეგობრების“ თავმჯდომარემ, ნინო ჩხობაძემ პირველ არხთან ისაუბრა იმაზე, რამდენად მაღალია საქართველომდე მავნე ნივთიერებების, მძიმე მეტალებისა და ტოქსინების მოღწევის საფრთხე კახოვკის კაშხლის დანგრევის შემდეგ.

.

„ამაზე არა მარტო ზეპირსიტყვიერად ვსაუბრობთ, არამედ ამას ანალიზებიც უჩვენებს, რომ ზღვა სუფთაა ჩვენ სანაპიროზე. ჩვენამდე შეიძლება, საერთოდ არ მოვიდეს დაბინძურება, რადგან მან უნდა გაიაროს დინებით თურქეთის სანაპირო და მხოლოდ შემდეგ შეიძლება, მოაღწიოს რამემ საქართველოს ტერიტორიაზე. საქართველოს ტერიტორიულ წყლებში ის ვერ შევა“, - განაცხადა ჩხობაძემ.

.

შეკითხვაზე, რამდენად სწორია ინფორმაცია, რომ დიდი ოდენობით ჩადენილმა მტკნარმა წყალმა შავ ზღვაში მარილიანობის მაჩვენებელი შეამცირა, ნინო ჩხობაძემ განაცხადა, რომ დნეპრი ყოველთვის ჩაედინებოდა შავ ზღვაში, ისევე, როგორც ბევრი სხვა მდინარე და იმ კონკრეტულ ტერიტორიაზე შეიძლებოდა, დიდი ნაკადის შედეგად მარილიანობა ოდნავ დაცემულიყო, მაგრამ შემდგომში ზღვა ყოველთვის აღადგენს მარილიანობას და ეს სტაბილური მარილიანობაა.

„ასე რომ, ვიყოთ მშვიდად. ზოგჯერ აღშფოთებული ვარ, როცა მოსახლეობა ამბობს, თითქოს რადიაციული დაბინძურებაა. რადიაციული დაბინძურება საერთოდ არ ყოფილა და საერთოდ არ მომხდარა არანაირი რადიაციული წყაროს გაჟონვა. ასე რომ, ეს ზედმეტი მღელვარება და რაღაც ჭორების გავრცელებაა. რადიაციული დაბინძურება საერთოდ არ ფიქსირდება იმ ზონაშიც კი, სადაც ტრაგედია მოხდა. ასე რომ, აქ ჩვენ პრობლემა არ გვაქვს თუ, რა თქმა უნდა, ზაპოროჟიეს ატომურ ელექტროსადგურზე არაფერი არ მოხდა. ჩვენ მოლოდინის რეჟიმში ვართ. არ მოხდეს ისე, რომ რუსეთის ფედერაციამ ზაპოროჟიეს ატომური ელექტროსადგური იარაღად გამოიყენოს, როგორც კახოვკა გამოიყენა. მაშინ უკვე ნამდვილად ძალიან დიდი ტრაგედია დატრიალდება“, – განაცხადა ჩხობაძემ.

.

მისი თქმით, გარემოს ეროვნულმა სააგენტომ ზღვის წყლის მონიტორინგი გააძლიერა, რაც ძალიან კარგია. მეორე მხრივ, აჭარის მთლიან სანაპიროზე ბაქტერიოლოგიური შეფასება ხორციელდება, კონტროლდება ფოთის აკვატორია და კარგი იქნება, თუ ზუგდიდი და გურიაც დაუკავშირდება ფოთის ლაბორატორიას, რომელსაც ამის შესაძლებლობა აქვს და ასე გურია-სამეგრელოს აკვატორიებიც შემოწმდება.

.

შეკითხვაზე, შესაძლებელია თუ არა, აფხაზეთში მკვდარი ცხოველების გამორიყვის ფაქტი კახოვკის ჰესის წყალსადენის აფეთქებას უკავშირდებოდეს, ჩხობაძემ განაცხადა, რომ აფხაზეთის ტერიტორიაზე საშინელი წყალდიდობებია და ლეში ზღვაში ჩვენმა მდინარეებმა ჩაიტანა, კახოვკას კი ამ ფაქტს თავად აფხაზებიც არ უკავშირებენ.

„დამხრჩვალ ქათმებს, ღორებს და სხვა რაღაცას უნდა ველოდოთ, რომ იქნება ჩამოტანილი მდინარეების მიერ, მაგრამ ზღვისთვის ესეც კი არ არის დიდი პრობლემა, იმიტომ, რომ ზღვა ასეთ რაღაცებს კარგად უვლის“, - განაცხადა ჩხობაძემ.

.

„დღეს უკვე ორმოცამდე დასახლებული პუნქტია დატბორილი. მართალია წყლის დონე დაეცა, მაგრამ მტკნარი წყლის ეს დიდი ნაკადი, პირდაპირ ჩაედინება შავ ზღვაში. ეს ბიბლიური შეიძლება იყოს, მაგრამ ეს კაცობრიობის წინაშე დანაშაულია. პირველ რიგში დავიწყებ იქიდან, რომ ეს არ ეხება მარტო ორ ქვეყანას - რუსეთს და უკრაინას. ეს შეეხება შავი ზღვის მთელს სანაპიროს, რაღაც მომენტში ჩვენც შეგვეხება, რადგან ტერიტორიულ წყლებთან მიმართებაში შავ ზღვაში ნაკადები ზოგჯერ მიდის სამხრეთიდან ჩრდილოეთისკენ და ზამთრის პერიოდში - ჩრდილოეთიდან სამხრეთისკენ. აბა როგორ აღმოჩნდა და რატომ აფეთქდა ნაღმი ბათუმთან? იმიტომ, რომ ასეთ ცირკულაცია ხდება ზღვაში. ძალიან დიდი ნაკადი მტკნარი წყლის შევიდა შავ ზღვაში, რომელიც არის დაბინძურებული შხამქიმიკატებით, დარწმუნებული ვარ, რომ დასახლებულ პუნქტებში ნავთობის მარაგებიც იყო, ჩვეულებრივი ბენზინგასამართი სადგურები, ყველაფერს გამორეცხავდა წყალი, ნაღმებიც შემოვიდოდა, ჩვენ ჯერ კიდევ არ ვიცით კატასტროფის მასშტაბების, რაც დაადგება ყველა იმ სახელმწიფოში, რომელიც შავი ზღვის გარშემოა“, - განაცხადა ნინო ჩხობაძემ.