სწორად „გაპიარებული“ ვირთხის ხიბლი

----------------------------------------------------

რამდენიმე წლის წინათ, სტუმრად ყოფნისას, ჩემი მეგობრის ჩასუქებულ ზაზუნას ვეფერებოდი. - რა საყვარელია, მეთქი - აღვნიშნე. მეგობარმა ღიმილით შემომხედა და მითხრა: - აი რას ნიშნავს კარგი „პიარის“ ძალა, თორემ ზაზუნაც იგივე ვირთხააო-.

ეს დიალოგი ამ დღეებში გამახსენდა.

23 აპრილს ამერიკის ფედერალურმა სამსახურებმა მოხსნეს 10 დღიანი პაუზა ჯონსონ&ჯონსონის ვაქცინაზე. ამ ვაქცინასაც ზუსტად იგივე „ბრალდება“ წაუყენეს, რაც ასტრაზენეკას, ახალგაზრდა ქალებში (55 წლამდე) განვითარებული ძალიან იშვიათი თრომბოზული გართულება, შესაძლო ლეტალური დასასრულით. ერთი წუთითაც არ შემპარვია ეჭვი, რომ FDA ჯონსონის ვაქცინას ბრიტანული ვაქცინასავით ვერ მოექცეოდა. უკვე 7 მილიონი ამერიკელია აცრილი ამ ვაქცინით და შესაბამისი ოფიციალური პირები სწრაფად გააცნობიერებდნენ რა შედეგი მოჰყვებოდა პანიკის ატეხვას 7 მილიონ ამერიკელში ამერიკის ტერიტორიაზე; ამასთან, არც იმის გაცნობიერება იქნებოდა რთული, თუ რა დარტყმას მიაყენებდა ეს ნაბიჯი ვაქცინაციის პროცესს, რაც ამერიკის ახალი ადმინისტრაციის ერთერთ მთავარ საამაყო პროექტს წარმოადგენს და მართებულადაც. ლოგიკა ცხადია ლოგიკაა და ხანმოკლე „მოთათბირების“ შემდეგ FDA-მ სასწრაფოდ დაასკვნა, რომ ჯონსონის ვაქცინა უსაფრთხოა და გარკვეული კორექტირებით შეიძლება და აუცილებელიცაა მისი გამოყენების გაგრძელება. ორშაბათს, 26 აპრილს, ფედერალურ კლინიკებში ოფიციალურად გვაცნობეს, რომ ჯონსონის ვაქცინით აცრა გრძელდება. გადაწყვეტილება ცხადია გონივრული იყო. ჯონსონის ვაქცინა ერთფაზიანია და საოცრად მოსახერხებელი ლოჯისტიკური თვალსაზრისით იმ ადამიანებისათვის, რომლებსაც მიზეზთა გამო უჭირთ სამედიცინო დაწესებულებებში ხშირად მისვლა. თანაც, ერთჯერადი აცრა სერიოზულად განტვირთავს სამედიცინო პუნქტებსაც.

რამდენად წარმატებით გაგრძელდება ჯონსონის გამოყენება, ჯერჯერობით უცნობია. ფსიქოლოგიურმა ფაქტორმა თავისი უარყოფითი გავლენა უკვე მოახდინა. შიშის მარცვალი ჩაგდებულია და მედიცინაში გაუთვითცნობიერებული ადამიანებისათვის ძნელია იმის შეგონება, რომ რეალობაში ეს ვაქცინა ძალიან ეფექტური და უსაფრთხოა.

FDA სერიოზულად გააკრიტიკეს ამ ნაბიჯის გამო და სამართლიანადაც. ჯერჯერობით ბევრი არ დაწერილა იმ გამანადგურებელ ეფექტზე, რომელიც FDA-მ მსოფლიოში მიმდინარე აცრის პროცესს მიაყენა ასტრაზენეკას ირიბი დისკრედიტაციით. მაშინ როდესაც WHO სერიოზულად ემზადება ჩინური ვაქცინების აღიარებისათვის, მიუხედავად უაღრესად მწირი ინფორმაციისა ამ ვაქცინის ეფექტურობისა და გვერდითი ეფექტების შესახებ, ამ ფონზე FDA-ს უარი, რომ საერთოდ განეხილა ასტრაზენეკას ვაქცინა, პრაქტიკულად ხელოვნური საბოტაჟის კვალიფიკაციაში გადადის. არაფერს ვამბობ იმაზე, რომ სერიოზული ფსიქოლოგიური ტრავმა მიადგა მილიონობით ადამიანს, რომლებმაც უკვე აიცრეს ასტრაზენეკათი; განსაკუთრებით კი იმათ, ვისაც მხოლოდ პირველი დოზა ჰქონდა გაკეთებული და არ დაუსრულებია ვაქცინაციის პროცესი.

„FDA-ს არ შეუცვლია თავისი „პაგონები“ - ასეთი სათაურით გამოქვეყნდა კატონის ინსტიტუტის ერთერთი კორესპოდენტის, მაიკლ კენონის სტატია 13 აპრილს. ასეც არის, „ბებერი, ზანტი კუ“ ამჯერადაც ძალიან უპასუხისმგებლოდ მოიქცა. როგორც ჩანს, ოპერაცია „კოსმოსური სისწრაფე“ იშვიათი გამონაკლისების ისტორიაში ჩაიწერება მხოლოდ. პარალელურად კი ძალიან მიზანმიმართულად, მკვეთრად ფოკუსირებული პიარით, უშეცდომოდ აგრძელებს სვლას ჩინეთი საკუთარი სტრატეგიული ინტერესების გასავრცელებლად. ამას საქართველოს მაგალითიც აშკარად მოწმობს. ბრიტანეთი მშვიდად მიჰყვება ოქსფორდის ვაქცინით აცრებს. გამოკითხვების თანახმად, ბრიტანელი მოქალაქეები სრულიად ენდობიან საკუთარ მეცნიერებს.

ამ ფონზე ბრაზილიამ მოულოდნელი ჭიტლაყი ამოსცხო რუსებს. სრულიად დაბლოკა გამალეას „სპუტნიკი“, რომელიც სხვა არაფერია, თუ არა სპეცსამსახურების მიერ მოპარული ბრიტანული ტექნოლოგიით დამზადებული სუროგატი.

თუმცა, როგორც ამ მიმოხილვის დასაწყისში ვთქვით, სწორი პიარი ვირთხას საყვარელ და ღუნღულა ზაზუნად აქცევს..."-წერს სოციალურ ქსელში აშშ-ში მცხოვრები ქართველი ექიმი ზურაბ გურული.