21 მარტი ქართული ჟურნალისტიკის დღეა. საქართველოს ჟურნალისტთა ფედერაციამ და თბილისის სახელმწიფო უნივერსიტეტმა პროფესიული დღე 1993 წელს ერთობლივად დააწესეს.
თარიღი პირველი ქართული გაზეთის დაარსებას უკავშირდება, რომელსაც თავდაპირველად „საქართველოს გაზეთი“, შემდეგ კი „ქართული გაზეთი“ ეწოდებოდა. “საქართველოს გაზეთის” პირველი ნომერი ძველი სტილით 1819 წლის 8 მარტს, ახალი სტილით კი 21 მარტს გამოიცა.
ჟურნალისტიკა, ზოგისთვის პროფესიაა, საყვარელი საქმე, ცხოვრების წესი და უბრალოდ საქმე, რომლის კეთების დროსაც ირგვლივ ყველაფერი გავიწყდება. ზოგისთვის ჟურნალისტიკა დღე-ღამეში 24 საათია დ კვირაში 7 დღე. ამბობენ, ჟურნალისტს სქესი არ აქვს და ეს პროფესია დაუფასებელიაო, თუმცა ისეთებიც არიან, ვინც ამტკიცებს, რომ თუ შენს საქმეს კეთილსინდისიერად მოეკიდები, აუცილებლად დაფასდება.
ძნელია იმის თქმა, რომ ჟურნალისტობა ადვილი პროფესიაა და ყველა ადამიანს შესწევს ძალა, ემსახუროს ამ საქმეს. ჟურნალისტობა ერთ-ერთი პოპულარული სპეციალობაა და ჟურნალისტის კარიერაზე მსოფლიოში უამრავი ახალგაზრდა ოცნებობს. ეს პროფესია ხშირად, განსაკუთრებით ქართველი ჟურნალისტებისთვის, მათთვის სასურველ, საზოგადოებისთვის მნიშვნელოვან და პრესტიჟულ სამსახურებში მოკალათების საწინდარია.
ჟურნალისტობა უმაღლეს კვალიფიკაციასთან, მრავალმხრივ ცოდნასთან, გამოცდილებასა და უსაზღვრო მოთმინებასთან ერთად უზარმაზარ ყოველდღიურ შრომას მოითხოვს.