1980 წლის 8 დეკემბერს, მკვლელობის დღეს დილის 10:00 საათზე, ლენონმა და ონომ საკუთარ ბინაში ინტერვიუ მისცეს მუსიკალური შოუსთვის RKO Radio Network-ში. ინტერვიუერები იყვნენ დეივ შოლინი, ლორი კეი, რონ ჰუმელი და ბერტ კინი. ისინი ბინაში იმყოფებოდნენ სანამ ლენონები საღამოს 17 საათზე არ გავიდნენ სახლიდან.

14:00 საათზე, ფოტოგრაფი ენი ლეიბოვიცი მივიდა მასთან ბინაში, რათა ლენონისთვის ფოტო გადაეღო ჟურნალ Rolling Stone-ის გარეკანისთვის. თავის მოგონებებში ლეიბოვიცი წერდა: „არავის უნდოდა იმის [გულისხმობს იოკო ონოს] გარეკანზე ფოტოს ხილვა, მაგრამ ჯონი დაჟინებით მოითხოვდა, რომ ისინი ერთად ყოფილიყვნენ სურათზე“.

გადაღების შემდეგ, 15:30 საათზე, ლეიბოვიცი წავიდა. 17:05 საათზე ჯონმა, იოკომ და რადიოს რეპორტიორებმა სახლი დატოვეს. ლენონები უნდა წასულიყვნენ Record Plant-ის ჩამწერ სტუდიაში, რათა სიმღერა Walking on Thin Ice-ს მიქშირება დაესრულებინათ (ონოს სიმღერა ლენონის სოლო გიტარის თანხლებით), მაგრამ მათი ლიმუზინი დანიშნულ დროს არ მოვიდა, ამიტომ ლენონი და იოკო სტუდიაში წავიდნენ RKO რადიოსადგურის მანქანით, სანამ მანქანაში ჩაჯდებოდნენ, რამდენიმე ადამიანმა სთხოვა ლენონს ავტოგრაფი (ფანები ხშირად ელოდნენ მას "დაკოტას" მახლობლად, რათა გასაუბრებოდნენ ან ავტოგრაფის მიეღოთ) - მათ შორის იყო მარკ ჩეპმენიც.

25 წლის მარკ დევიდ ჩეპმენი მუშაობდა დაცვის თანამშრომლად, ვაიკიკის ბინა კომპლექსში ჰონოლულუში, ჰავაი, აშშ.

მან მკვლელობის დაგეგმვა ჩადენამდე სამი თვით ადრე დაიწყო. მანამდე, იმავე წლის ოქტომბრის ბოლოს (Double Fantasy ალბომის გამოშვებამდე), ის უკვე ნიუ-იორკში იყო ჩასული და ლენონის მოკვლას აპირებდა; ამ მოგზაურობისთვის მან გაყიდა ნორმან როკველის ლითოგრაფია "სამმაგი ავტოპორტრეტი" და იყიდა პისტოლეტი მეგობრისგან, მაგრამ მკვლელობა ვერ ჩაიდინა, რადგან მას სჭირდებოდა ვაზნები, რომელთა შეძენაც ლეგალურად არ შეიძლებოდა ნიუ-იორკში.

5 ნოემბერს იგი გაფრინდა მშობლიურ ქალაქ ატლანტაში ვაზნების შესაძენად. რამდენიმე დღის შემდეგ ის პისტოლეტითა და ვაზნებით დაბრუნდა ნიუ-იორკში, მაგრამ ფილმის ყურების "ჩვეულებრივი ხალხის" შთაბეჭდილების ქვეშ მყოფმა გადაიფიქრა ლენონზე თავდასხმა და ნოემბრის შუა რიცხვებში დაბრუნდა ჰავაიში. ჩეპმენმა ცოლს უამბო თავისი გეგმების შესახებ, მან სთხოვა ემკურნალა. რის შემდეგაც მარკმა ფსიქიატრთან შეხვედრაც კი დანიშნა, თუმცა, ბოლოს ცოლი დაარწმუნა, რომ იარაღი მოიშორა და მკვლელობის ჩადენა გადაიფიქრა და რომ საბავშვო წიგნის დაწერას აპირებდა. 6 დეკემბერს, მკვლელობამდე ორი დღით ადრე, ის დაბრუნდა ნიუ-იორკში.

8 დეკემბერს, მკვლელობის დღეს, ჩეპმენი შეხვდა მოყვარულ ფოტოგრაფ პოლ გორესს დაკოტას კორპუსში, რომელიც ასევე ელოდებოდა ჯონ ლენონს და დახმარება სთხოვა; ჩეპმენმა გორესს 50 დოლარი გადაუხადა ჯონთან ფოტოს გადასაღებად, იმ დროს, როდესაც ჯონი ხელს მოაწერდა ავტოგრაფს, რადგან, მისი თქმით, წინააღმდეგ შემთხვევაში, ჰავაიზე არავინ დაიჯერებდა, რომ ავტოგრაფი ნამდვილი იყო. როდესაც ლენონი, ონო და RKO-ს რეპორტიორები გადიოდნენ, მკვლელმა უსიტყვოდ გადასცა ჯონს Double Fantasy-ის ასლი და კალამი. მან გაიღიმა და დისკის გარეკანზე მიაწერა: „ჯონ ლენონი, 1980 წლის დეკემბერი“. ჯონმა ჰკითხა: "ეს არის ყველაფერი რაც გინდოდა?"

ჩეპმენმა შემდეგი რამდენიმე საათი გაატარა დაკოტას შესასვლელთან და ელოდა ლენონის დაბრუნებას. როდესაც ჰელენ სიმენი (ლენონისა და ონოს ოჯახის ძიძა) და ხუთი წლის შონ ლენონი სახლში ბრუნდებოდნენ სეირნობიდან, ჩეპმენი მიუახლოვდა ბიჭს, ხელი ჩამოართვა და უთხრა რომ პატივი იყო მასთან შეხვედრა.

საღამოს 8 საათზე ფოტოგრაფმა პოლ გორეშმა თქვა, რომ სახლში .ნიუ ჯერსიში უნდა წასულიყო, რადგან ლენონები ალბათ შუაღამემდე არ დაბრუნდებიან. ჩეპმენი ცდილობდა დაერწმუნებინა ფოტოგრაფი რომ დარჩენილიყო, თუმცა უშედეგოდ.

. ”მე დაველოდები”, - უთხრა ჩეპმენმა -შენ არ იცი, კიდევ ნახავ თუ არა მას.”

გორეში წავიდა და ჩეპმენი დარჩა კარისკაცთან ხოსე პერდომოსთან.

საღამოს 22:30-ზე, სიმღერაზე Walking On Thin Ice ოთხსაათიანი მუშაობის შემდეგ, ლენონებმა დატოვეს სტუდია. სახლისკენ მიმავალ გზაზე მათ სურდათ შეევლოთ საჭმელად Stage Deli-ზე, მაგრამ გადაიფიქრეს, რადგან ჯონს სურდა დაკოტაში დაბრუნება, რათა ღამე მშვიდობისა ეთქვა შონისთვის.

ლენონს უყვარდა ფანების გახარება, რომლებიც დიდხანს ელოდნენ მის ავტოგრაფილს ან მასთან ფოტოს გადაღებას. 6 დეკემბერს, საღამოს, გარდაცვალებამდე ორი დღით ადრე BBC Radio 1-თან ინტერვიუში მან თქვა, რომ მოსწონდა ნიუ-იორკი ზუსტად იმიტომ, რომ აქ თაყვანისმცემლები მას არ აწუხებენ, არ იყვნენ მომაბეზრელები." ხალხი მოდის და ავტოგრაფებს მთხოვს ან ამბობს: „გამარჯობა ."

როგორც ჩანს, ამიტომაც, "დაკოტას" დაცულ ეზოსთან ლიმუზინიდან გადმოსვლის ნაცვლად, ლენონებმა ის დატოვეს 72-ე ქუჩაზე და ფეხით განაგრძეს გზა . საღამოს 22:50 იყო. იოკო წინ წავიდა, ჯონი უკან მიდიოდა და კასეტები ეჭირა. მან ჩეპმენს შეხედა და გავლისას თავი დაუქნია. მას შემდეგ, რაც ლენონი არკაში შევიდა, მარკ დევიდ ჩეპმენმა ქურთუკის ჯიბიდან ამოიღო Charter Arms .38 Special რევოლვერი, დაიკავა სასროლე პოზიცია და ლენონს ზურგში ხუთჯერ ესროლა.

არაერთი რადიო, ტელევიზია და გაზეთი ამტკიცებდა, რომ ჩეპმენმა გასროლის წინ დაუძახა ჯონს სიტყვებით: „მისტერ ლენონ“. ეს ბრალდებები ეფუძნებოდა იმ ღამეს NYPD დეტექტივის ჯეიმს სალივანის განცხადებას. თავად ჩეპმენმა თქვა, რომ არ ახსოვს დაუძახა თუ არა ლენონს მაგრამ 1992 წელს ბარბარა უოლტერსისთვის მიცემულ ინტერვიუში მან დაადასტურა, რომ სასროლე პოზიცია დაიკავა.

ლენონი დაეცა, მაგრამ ადგომა მაინც მოახერხა და "დაკოტას" ვესტიბიულის კიბეებს აუყვა სადაც გაუგებრად წაილუღლუღა : „მე მესროლეს, მე მესროლეს“ (ინგლ. I'm shot. I'm shot - დიდი ალბათობით, ეს იყო ჯონ ლენონის ბოლო სიტყვები) - და ისევ პირქვე დავარდა, კასეტები ძირს დაიყარა. ჯონს მასიური სისხლდენა დაეწყო ჭრილობებიდან და პირიდან. კონსიერჟ ჯეი ჰასტინგსს თავდაპირველად სურდა ლენონისთვის ქსოვილი გადაეჭირა, რათა სისხლდენა შეეჩერებინა, მაგრამ მას შემდეგ რაც მისი სისხლიანი პერანგი გახია, მიხვდა, რომ აზრი აღარ ჰქონდა.

ლენონი უკვე გარდაცვლილი მიიყვანეს მაუნტ საინაი რუზველტის საავადმყოფოში. ამ ტრაგიკული ამბის ადგილობრივი სატელევიზიო სადგურებიდან გახმაურების შემდეგ მისი უამრავი თაყვანისმცემელი შეიკრიბა რუზველტის საავადმყოფოსა და დაკოტას შენობებთან. 10 დეკემბერს ქალაქ ნიუ-იორკში ფერნკლიფის სასაფლაოზე ლენონს კრემაცია ჩაუტარეს, მისი ფერფლი კი ონოს გადასცეს. ონოს გადაწყვეტილებით მისი მეუღლის დაკრძალვის ცერემონია არ ჩატარდა.

ლენონის გარდაცვალება მაყურებელს ABC-ის არხზე სპორტულმა კომენტატორმა ჰოვარდ ქოსელმა აცნობა „მაიამი დოლფინსსა“ და „ნიუ-ინგლენდ პეტრიოტს“ შორის ამერიკული ფეხბურთის მატჩის ტრანსლირების დროს.

ჩეპმენი დამნაშავედ ცნეს და უვადო თავისუფლების აღკვეთა მიუსაჯეს. 2000-2018 წლების განმავლობაში, ყოველ ორ წელიწადში ერთხელ, კომისიამ ათჯერ არ დააკმაყოფილა ჩეპმენის განცხადება ვადაზე ადრე გათავისუფლების შესახებ.ამჟამად ჩეპმენი 69 წლისაა.

მთავარ ფოტოზე:ჯონ ლენონი სიკვდილამდე რამდენიმე საათით ადრე ავტოგრაფს აძლევს მარკ ჩეპმენს Double Fantasy-ის ასლზე