კოალიცია “ქართული ოცნების“ ერთ-ერთი ლიდერის კახი კალაძის უახლოესი გარემოცვის წევრი ცოტნე შენგელია სამართალდამცველების ინფორმაციით, გორის პოლიციის განყოფილებაში გადაიყვანეს. აღნიშნული ინფორმაცია სამართალდამცველებმა შენგელიას ოჯახის წევრებს იმერეთის სამხარეო სამმართველოს პოლიციის განყოფილებაში მიაწოდეს, თუმცა არსებობს საფუძვლიანი ეჭვი, რომ სამტრედიიდან შენგელია სწორედ იმერეთის სამხარეო სამმართველოში მიიყვანეს, საიდანაც მას გვიან ღამით გორში გადაიყვანენ. ცოტნე შენგელიას ოჯახის წევრებმა იმერეთის სამხარეო სამმართველოს სარეგისტრაციო ჟურნალში დაკავებიდან 40 წუთის შემდეგ სწორედ იმ მანქანის სერია და ნომერი ამოიცნეს, რომლითაც სამართალდამცველებმა შენგელია დააკავეს. ავტომანქანა სერიით - “CLC“ სამტრედიის პოლიციის უფროსს ეკუთვნის. "ინფო-9" -სთან სამართალდამცველებმა განმარტეს, რომ სამტრედიის პოლიციის უფროსი იმერეთის სამხარეო სამმართველოში თათბირზე დაიბარეს, თუმცა გაირკვა, რომ სამართალდამცველებს დღეს არანაირი თათბირი არ ჩაუტარებიათ.