სუს-მა ვალერი კვარაცხელიას ოფიციალური შეტყობინება გაუგზავნა, რომელსაც ხელს სახელმწიფო უსაფრთხოების სამსახურის განსაზღვრული კომისიის თავმჯდომარე სულხან გოცაძე აწერს.

უსაფრთხოების სამსახური ვალერი კვარაცხელიას ატყობინებს, რომ მის მიერ დაფუძნებული „სახალხო მოძრაობა სოციალისტური საქართველო“ მიმდინარე წლის 9 მაისს ამ თარიღის აღსანიშნავად გეგმავს საჯარო ღონისძიებების გამართვას, სადაც გამოყენებული იქნება საბჭოთა კომუნისტური ტოტალიტარული სიმბოლიკა.

სუს-ი განმარტავს, რომ საქართველოს კანონის მე-7 მუხლის მე-6 პუნქტის მოთხოვნების შესაბამისად, საქართველოში საბჭოთა სიმბოლიკის გამოყენება აკრძალულია. ამდენად, სუსი ამ კანონს იშველიებს და მოძრაობის თავმჯდომარეს, ვალერი კვარაცხელიას სთხოვს, არ დაუშვას და აღმოფხვრას ხსენებულ ღონისძიებებზე კომუნისტური სიმბოლიკის გამოყენება. წინააღმდეგ შემთხვევაში გამოყენებული იქნება საქართველოს კანონმდებლობით გათვალისწინებული პასუხისმგებლობის ზომები..

ოფიციალური მიმართვის ტექსტს ჟურნალისტი ვალერი კვარაცხელია სოციალურ ქსელში თავადვე აქვეყნებს და წერს, რომ ეს არის სახელმწიფოებრივი ნონსენსი. ნონსენსია, რადგან საქართველოს ხელისუფლება ზეიმობს 9 მაისს, პატივს მიაგებს უცნობი ჯარისკაცის საფლავს, რომლებიც ასევე საბჭოთა სიმბოლიკაა, მაგრამ მეორე მხრივ კრძალავს საბჭოთა სიმბოლიკას.

კვარაცხელია ამ შინაარსის შეკითხვების დასმას ხელისუფლების მაღალჩინოსნებისთვის სწორედ ვაკის პარკში, მემორიალთან აპირებს.