„ქართული ოცნების“ წევრი ზვიად კვაჭანტირაძე ამბობს, რომ ივანიშვილის პარტიის თავმჯდომარედ ოფიციალურად არჩევისთანავე ქართულ მედიას შეხვდება.

სამწუხაროდ პარტია ისე ვერ განვითარდა, როგორც საჭიროა პოლიტიკური ცხოვრებისთვის და როგორც დაგეგმილი იყო თავის დროზე. ეს დიდწილად განაპირობა იმან, რომ ივანიშვილი წავიდა და ჩვენ დავინახეთ, რომ ის ისევ საჭირო იყო. ვხვდებით, რომ პარტიას სჭირდება განვითარება. ბატონმა კვირიკაშვილმა შესთავაზა ბიძინა ივანიშვილს პარტიის თავმჯდომარეობა, რაზეც თანხმობა მიიღო. ბატონმა ბიძინამ გვითხრა, რომ არცერთ ჟურნალისტს არ ექნება მასთან კომუნიკაციის პრობლემა. მას შემდეგ, რაც ოფიციალურად აირჩევენ თავმჯდომარედ და ეს მოხდება მაისის პირველ დეკადაში თუ არა, თვის პირველ ნახევარში მაინც და შემდეგ უკვე ბატონი ბიძინა ჟურნალისტებთან შეხვედრას გამართავს.

იმედს ვიტოვებ, რომ ბატონი ბიძინას დაბრუნებით უკან დავიბრუნებთ ჩვენს იმ მხარდამჭერებს, რომლებმაც სამართლიანადაც კი დაგვტოვეს და სხვა არჩევანი გააკეთეს. ახლა გვეძლევა შესაძლებლობა კვლავ გავერთიანდეთ ჩვენი ლიდერის ირგვლივ სასიკეთო საქმეების გასაკეთებლად, “ - აღნიშნავს კვაჭანტირაძე.

შეგახსენებთ, დღეს „ქართული ოცნების“ პარტიული სხდომა გაიმართა, სადაც ივანიშვილის პოლიტიკაში დაბრუნება გადაწყდა. ამის შესახებ პრემიერმა გიორგი კვირიკაშვილმა საგანგებო პრესკოფერენციაზე განაცხადა და აღნიშნა, რომ პარტიის თავმჯდომარის პოსტს კვლავ ბიძინა ივანიშვილი დაუბრუნდება.