სანქტ-პეტერბურგში საქართველომდე მანძილის აღმნიშვნელი უჩვეულო საგზაო ნიშნები გამოჩნდა, რამაც მნახველიც გააკვირვა და ქართველებიც. საგზაო ნიშნებზე ასევე გამოსახულია ქართული ტრადიციული სამზარეულოს სიამაყე — აჭარული ხაჭაპური და საქართველოსთვის სიყვარულის ახსნა.

აქცია უკავშირდება ქართული კულტურის პირველ ფესტივალს ГрузияPLAY, რომელიც სანქტ-პეტერბურგში დიზაინის ცენტრ ARTPLAY-ში 17 და 18 თებერვალს ჩატარდა. ფესტივალს სოციალურ ქსელში ხანგრძლივი სარეკლამო კამპანია უძღვოდა, რომელიც საკმაოდ კრეატიულად დაიგეგმა და განხორციელდა.

ორდღიან ღონისძიებაზე ცნობილი ქართველი შემსრულებლები და ანსამბლები — ნინო ქათამაძე და ჯგუფი Insight, ასევე ჯგუფი „მგზავრები" მონაწილეობდნენ.

ГрузияPLAY სტუმრებს ქართულ თანამედროვე კინოჩვენებებს, მხატვართა გამოფენებს, შემეცნებით თემატურ ლექციებსა და გასტრონომიულ მოგზაურობას სთავაზობს საქართველოში. ფესტივალი სანქტ-პეტერბურგის კულტურის კომიტეტის დაფინანსებითა და მხარდაჭერით გაიმართა.