საქართველო აფხაზეთი სავსეა საქართველოდან შემოტანილი პროდუქციით, რასაც არ ვემხრობით - ხაჯიმბა 2017, 23 დეკემბერი, 0:51
აფხაზეთის დე ფაქტო პრეზიდენტმა რაულ ხაჯიმბამ განაცხადა, რომ აფხაზეთის ბაზარი საქართველოდან შეტანილი პროდუქციით არის სავსე, რის გამოც აუცილებელია, საზღვარზე საქონლის გადაადგილება გაკონტროლდეს. ხაჯიმბამ ხაზი გაუსვა, რომ საბაჟოს გახსნა „საქართველოსთან ეკონომიკური ურთიერთობების აღდგენას არ ნიშნავს“.
„სპუტნიკ აბხაზიას“ ინფორმაციით, რაულ ხაჯიმბამ წლის შემაჯამებელ პრესკონფერენციაზე გაიხსენა, რომ საბაჟო პუნქტი ომის შემდეგ მუშაობდა და საბაჟო გადასახადიც იყო, თუმცა მოგვიანებით პუნქტი დაიხურა.
„არავინ ამბობს, რომ საქართველოსთან სახელმწიფო დონეზე ეკონომიკური ურთიერთობის დამყარებას ვაპირებთ, მაგრამ ეკონომიკური ურთიერთობები დაამყარეს სრულიად სხვა ადამიანებმა, რომლებიც ამ საზღვარზე მუშაობენ.
არავისთვის საიდუმლო არ არის, რომ საქართველოდან საზღვრის გავლით საქონელი აფხაზეთში ხვდება. ეს ნაკადი აუცილებლად უნდა გაკონტროლდეს. აფხაზეთის ყველა ბაზარში საქართველოდან შემოტანილი ან საქართველოში დამზადებული საქონელი იყიდება.
რატომ უნდა ვაძლევდეთ ზოგიერთი კატეგორიის ხალხს ჩვენს ბაზარზე დემპინგის საშუალებას. ჩვენ საქართველოსთან ეკონომიკური ურთიერთობების დამყარებას კი არ ვემხრობით, არამედ უფრო მკაცრი კონტროლის პროცესს და სახელმწიფოსთვის შესაბამისი შესაძლებლობების მიღებას ვუჭერთ მხარს. აფხაზეთის ტერიტორიიდან თხილი გააქვთ, რომელიც საბაჟო გადასახადებს ექვემდებარება. ეს თემა ჯერ ღიაა, განიხილება, ხოლო ტვირთი, რომელიც იმ მხრიდან გადმოდის, ფასთან კავშირში, არ შემიძლია ვთქვა, რომ შეედრება ტვირთს, რომელსაც რუსეთ-აფხაზეთის და საზღვაო საზღვრით ვუშვებთ, მაგრამ ის საკმაოდ მნიშვნელოვანია და ჩვენ ვკარგავთ დიდ თანხებს. ამიტომ ეს საკითხები უნდა დამუშავდეს და უნდა ვიფიქროთ იმაზე, თუ როგორ გამოვიყენოთ სწორად ეს შესაძლებლობები“, – ციტირებს „სპუტნიკ აბხაზია“ დე ფაქტო პრეზიდენტის განცხადებას.
194 3-ს მოსწონს
|
  |
Intermedia.ge © 2011-2024 წელი
საავტორო უფლებები დაცულია
 |
