დღეს, 2017 წლის 24 ოქტომბერს, საქართველოს საპატრიარქოს წმიდა ანდრია პირველწოდებულის სახელობის ქართულ უნივერსიტეტში გაიმართა პროფესორ იოსებ ჭუმბურიძის წიგნის პრეზენტაცია- "დუმილი რეკავს", რომელიც მიეძღვნა ყველასათვის საყვარელ პოეტ მუხრან მაჭავარიანს.

წიგნი პიესის სახით არის შედგენილი, რომელსაც თან სდევს მუხრან მაჭავარიანის ლამაზ-ლამაზად დაწყობილი ლექსები:

"-მუხრანის ხმას საქართველოში ყველა ადვილად გამოარჩევს:

ტა,

ტა,

ტა,

ტა!

რანაირად ბრდღვინავს არაგვი!

-დიახ, მუხრანის ლექსი, უწინარესად, მქუხარებასთან არის გაიგივებული.

თვითონვე წერს:

ჰქუხდა სტრიქონი.

ხმა ქარიშხალს იწვევდა ხმალში..."

ღონისძიება გახსნა რექტორმა სერგო ვარდოსანიძემ, წიგნის ავტორმა იოსებ ჭუმბურიძემ დაწვრილებით მიმოიხილა წიგნის შექმნის ისტორია. ასევე მუხრანის შემოქმედებასა და წიგნზე ისაუბრა მწერალმა მაკა ჯოხაძემ, პროფესორებმა: ეთერ თათარაიძემ, ამირან არაბულმა, ტარიელ ფუტკარაძემ, გიორგი ხორბალაძემ და პოეტმა ჯემალ ინჯიამ.

უნივერსიტეტის ჰუმანიტარულ მეცნიერებათა და სამართლის სკოლის ფილოლოგიის მიმართულების მეოთხე კურსის სტუდენტებმა-ტატა ცერცვაძემ, ნინო ოკრიბელაშვილმა, ლიზა ტუგულაშვილმა, მაიკო ქავთარაძემ და ჯუანშერ წიქარიშვილმა წარმოადგინეს ლიტერატურული კომპოზიცია.

"დუმილი რეკავს,

დუმილი რეკავს

ჯვრით,

ალავერდით,

გელათით,

ტბეთით...

ხმა თუა ნეტავ,

ხმა თუა ნეტავ, -

ამ უხმო ხმაზე

რომაა მეტი!.."

მუხრან მაჭავარიანი