ჩვეულებრივ, ღობეზე გაკრული აბრა, გამაფრთხილებელი წარწერით: «ეზოში ავი ძაღლია», კერძო საკუთრების დაცვის ერთ-ერთი საშუალებაა. კერძო ორგანიზაციებს ყოველთვის აქვთ სპეციალური დაცვის სისტემა, რომელსაც დაცვის პოლიცია აკონტროლებს, ხოლო სახლს-კარს და ეზოს, ხშირ შემთხვევაში, ოჯახის საყვარელი ძაღლი დარაჯობს. და ეს თუ ასეა, ძაღლის პატრონის ვალია, «ავი ძაღლის» არსებობის შესახებ, ირგვლივმყოფები გააფრთხილოს.

ამის გაკეთების ყველაზე მარტივი საშუალება, რა თქმა უნდა, აბრის გაკეთებაა, შესაბამისი წარწერით.

აბრა «ფრთხილად, ავი ძაღლია» აუცილებლად უნდა ეკიდოს კერძო სახლის და საწარმოს ღობეზე, თუ ის ცხოველების დაცვის ქვეშ იმყოფება. ასეთ შემთხვევაში, თუ ვინმე შეეცდება ტერიტორიაზე შეღწევას, ეცოდინება მოსალოდნელი საფრთხის შესახებ.

ასეთი აბრის გარეშე, დაზარალებულმა, შეიძლება პატრონს უჩივლოს იმის გამო, რომ მას არ შეატყობინეს საფრთხის შესახებ და ზარალის ანაზღაურებაც მოითხოვოს.

ამიტომ, თუ ეზოში ძაღლია, პატრონმა წინდახედულება უნდა გამოიჩინოს და ღობეზე შესაბამისი შინაარსის აბრა მიამაგროს.

ტექსტი მარტივი შინაარსის უნდა იყოს და ადვილად იკითხებოდეს.

ხოლო უცხოელებისთვის და ბავშვებისთვის, რომლებმაც ჯერ კითხვა არ იციან, დამატებით, ძაღლის გამოსახულებაც უნდა იყოს.

«ფრთხილად, ეზოში ავი ძაღლია» – როდესაც ღობეზე ამ წარწერას ვხედავთ, თვალწინ დიდი ზომის გაალმასებული, ეშვებიანი ძაღლი წარმოგვიდგება. მაგრამ, სინამდვილეში, ყველაფერი ასე ცუდადაც არ არის და ეზოში დიდი ძაღლის ნაცვლად, შეიძლება, მაგ., პუდელი დარბოდეს ან იქნებ... კატა თბებოდეს მზეზე. თუმცა, ვინ იცის?!