მონტეფიორეს სამედიცინო ცენტრში (ბრონსკი, აშშ) წარმატებით დააცილეს ერთმანეთს სიამის ტყუპები, რომლებიც თავებით იყვნენ შეზრდილი.

ამჟამად 13 თვის ჯეიდონ და ანიას მაკდონალდები რეაბილიტაციას გადიან უმძიმესი, სიცოცხლისათვის საშიში ოპერაციის შემდეგ, რომელიც 20 საათზე მეტ ხანს გრძელდებოდა.

ოპერაცია ქირურგ-ნეიროლოგმა ჯეიმს გუდრიჩმა გააკეთა. ოპერაციის მსვლელობის დროს ექიმი პროცედურის შეწყვეტის პრობლემის წინაშეც კი დადგა, რადგან აღმოჩნდა, რომ პატარებს გაცილებით მეტი ტვინის ქსოვილი ჰქონდათ საერთო, ვიდრე ეს ნავარაუდევი იყო და ეს მიუხედავად იმისა, რომ წინასწარ იყო შემუშავებული ოპერაციის კომპიუტერიზებული 3D-მოდელირება.

ლანცეტით გაკეთებული თითოეული ჭრილობისას ანიასის წნევა და გულისცემა მკვეთრად კლებულობდა, თუმცა ბოლოს და ბოლოს ქირურგმა შეძლო შექმნილი სიტუაციიდან გამოსავლის პოვნა და ოპერაციის დასრულება.

სიამის ტყუპების გაყოფა საოცრად რთული პროცედურა აღმოჩნდა. ბავშვების ერთმანეთისაგან დაცილება ნიშნავდა იმას, რომ მათგან ერთ-ერთ ტყუპისცალს ან სულაც ორივეს შეიძლებოდა სიცოცხლე საოპერაციო მაგიდაზე დაესრულებინა ან სამუდამოდ გონებრივი ჩამორჩენილობისათვის ყოფილიყო განწირული, მით უმეტეს, რომ ანიასი (სურათზე მარჯვნივ) ინვალიდობის გაცილებით უფრო მძიმე ფორმით იტანჯებოდა, ვიდრე მისი ძმა.

ბიჭები საკეისრო კვეთის შედეგად დაიბადნენ გასულ 2015 წელს ჩიკაგოს გარეუბანში; მათი მშობლები-31 წლის ნიკოლი და 37 წლის კრისტიანი არიან.

ტექნიკური კუთხით ანიასი და ჯეიდონი კრანიოპაგები (ასე ეწოდება მედიცინაში სიამის ტყუპებს, რომლებსაც საერთო თავის ტვინი აქვთ) არიან.

კრანიოპაგია-ესაა მოვლენა, რომელიც 2, 5 მილიონი მშობიარობიდან ერთხელ ხდება.

ტყუპი-კრანიოპაგების 40% მკვდარი იბადება, გადარჩენილების მესამედი დაბადებიდან 24 საათში კვდება, ხოლო დანარჩენის 80% იღუპება ორი წლის ასაკამდე იმ შემთხვევაში, თუ მათ ერთმანეთისაგან არ დააცალკავებენ.

ოპერაციის ღირებულებამ 2, 5 მილიონი დოლარი შეადგინა. თანხის მნიშვნელოვანი ნაწილი ოჯახის სამედიცინო დაზღვევამ დაფარა. დანარჩენი ფულის შეგროვებას კი ბიჭუნების მშობლები საიტ GoFundMe-ის მეშვეობით ცდილობენ.

(სამწუხაროა, რომ ქვეყანაში, სადაც უამრავი მილიონერია, არ აღმოჩნდა ქველმოქმედი, ვინც საბრალო ბავშვებს და მათ მშობლებს დაეხმარებოდა და ამ უნიკალურ ოპერაციას დააფინანსებდა).

ჩემის მხრივ, მინდა რეაბილიტაციის წარმატებით გავლა, ჯანმრთელობა და კარგი მომავალი ვუსურვო პატარებს.