ნისლიდან

ნისლით გახვეული გზის პირას ფეხის ხმა გაისმა და ლინმა ჩანთას ხელი უფრო მაგრად მოუჭირა. სიბნელიდან ემილი გამოჩნდა. ისევე როგორც ლინი, ისიც მეძავი იყო.
– გამოიჭირე ვინმე? – ჰკითხა ლინმა.
– ისე რა, იყო ცოტა რამ. შენ?
– ჯერ არა.
– ეს ყველაფერი, იმ მფატვრელის ბრალია, – ამოიოხრა ემილიმ. – მგონი, მთელს ლონდონს ეშინია ჯეკის.
– სინამდვილეში მას ჟაკლინი ჰქვია, – თქვა ლინმა და ჩანთიდან დანა ამოიღო.

კურტ ჰომანი

ჯადოქარი და მისი ასისტენტი

კარმენ დიდებული ვერაფრით იჯერებდა, რომ ნინა მას ღალატობდა. რისხვისაგან შეშლილმა, შურისძიება გადაწყვიტა.
ნინა ყუთში შეძვრა და მათი საფინალო ნომერი დაიწყო. ეს იყო პროგრამის საუკეთესო ნომერი, რომელსაც აღფრთოვანებაში მოჰყავდა მაყურებელი. კარმენ დიდებული, მართლაც რომ დიდებული იყო სცენაზე – მას აშკარად ჯადოსნური ძალები ეხმარებოდნენ და მხოლოდ მოხერხებული ხელები არ იყო მთავარი. როდესაც უკანასკნელი დაშნა მოხვდა ყუთს, მოკლე კივილის ხმა გაისმა.
– აბრაკადაბრა! – წარმოთქვა კარმენმა.

მარტა ჯარა

უბედური შემთხვევა

«სელია, შენა ხარ ყველაფერში დამნაშავე. შენ ჩემს გაბერილ სხეულს აუზში იპოვი. მშვიდობით.

უმბერტო».

ის სახლიდან გამოვიდა, ხელში წერილი ეჭირა, და მე დამინახა. აუზში სახით ქვევით ვიწექი და აბაზანაში ჩავარდნილ გიგანტურ ბუზს ვგავდი. როდესაც ის წყალში ჩახტა ჩემს გადასარჩენად და გაახსენდა რომ ცურვა არ იცოდა, მე წყლიდან ამოვედი.
პატიმარი 338412.

ტომ ფორდი

სისხლზე დაფიცება

– საიდუმლოს შენახვა შეგიძლია, ემ?

– რა თქმა უნდა.
– სისხლზე დაიფიცებ?
– მომისმინე, ტაი…
– ო, მაპატიე, ექიმო, მე დამავიწყდა. მას შემდეგ რაც უნივერსიტეტი დაამთავრე, შენ საკუთარი თავი, ყველა ჩვენგანზე ჭკვიანი გგონია.

ემეტმა ღრმად ჩაისუნთქა და ხელი გაუწოდა. დანა სისხლით შეიღება. მათ ცერა თითები ერთმანეთს შეახეს.
– აბა მითხარი, საიდუმლო რა არის?

სისხლი, ორივეს თითიდან, იატაკზე წვეთავდა.
– მე შიცი მაქვს, ძმაო.

ჯო ჰაბლი

ცხოველების ბაზარი

– ჰენრი, – თქვა თუთიყუშმა, როდესაც ორი პოლიციელი გვამის დასათვალიერებლად მივიდა, რომელიც სისხლის გუბეში იწვა.

– ჰენრი, არ გინდა! – დაიყვირა თუთიყუშმა.
ერთი პოლიციელი მივიდა მაგიდასთან და მოკლულის დღიურში ჩაიხედა. გადაშლილი დღიურის ფურცელზე წითელი ფანქრით იყო შემოხაზული დრო «9:30» და მიმდინარე თარიღი.
– ჰენრი, გთხოვ! – წამოიკივლა ისევ თუთიყუშმა.
– საინტერესოა, რამდენი ნაცნობი ჰყავს ამ ბიჭს, რომელსაც ჰენრი ჰქვია?
– მხოლოდ ერთი.

სკოტ დ. შოუ