ახლახანს Pantone Color Institute-მა დაასახელა ფერი, რომელიც 2015 წელს ყველაზე აქტუალური იქნება. ექსპერტების აზრით, დამდეგ წელს ყველაზე მოდური იქნება ტონი, სახელად "მარსალა" - თბილი ბორდოსფერ-ყავისფერი.

2015 წლის მთავარმა ფერმა სახელწოდება მიიღო ამავე სახელწოდების სიცილიური სადესერტო ღვისგან. "მარსალა განასახიერებს გემრიელი სადილით მიღებულ სიამოვნებას, მისი მოწითალო-ყავისფერი შეფერილობა კი დახვეწილობასა და ბუნებრივობას აფრქვევს", - ვკითხულობთ Pantone-ს ოფიციალურ ვებგვერდზე.

ფერის ინსტიტუტის აღმასრულებელმა დირექტორმა, ლეატრის აისმანმა (Leatrice Eiseman) აღნიშნა, რომ მარსალას შეფერილობა "განასახიერებს თავდაჯერებულობასა და სტაბილურობას", მაგრამ ამავდროულად "გვიზიდავს თავისი სითბოთი".

Pantone-ში 2000 წლიდან მიმდინარეობს წლის ყველაზე აქტუალური ფერების კვლევა. ფერის ამ ინსტიტუტის მიერ შემუშავებულ რეკომენდაციებს ითვალისწინებენ მსოფლიოს წამყვანი დიზაინერები.