ინტრიგადაკარგული იტალიის სერია A-ს ბოლო ტური "მილანის" ლეგენდარული ფეხბურთელების გაცილებით გამოირჩა. ექვსმა ვეტერანმა: ფილიპო ინძაგიმ, ჯენარო გატუზომ, ალესანდრო ნესტამ, კლარენს ზეედორფმა, ჯანლუკა ძამბროტამ და მარკ ვან ბომელმა 2012 წლის 13 მაისს "როსონერის" მაისურით თავიანთ უკანასკნელ მატჩში ითამაშეს. იტალიის ექსჩემპიონი "ნოვარას" შეხვდა და ანგარიშით 2:1 გაიმარჯვა. გამარჯვების გოლი "სუპერ პიპო" ინძაგიმ გაიტანა, ეს მისთვის "მილანის" რიგებში ჩატარებული მე-300 მატჩი გახლდათ. მსოფლიოს ერთ-ერთი საუკეთესო თავდამსხმელი კარიერას ასრულებს.

რაც შეეხებათ გატუზოს, ნესტას, ზეედორფს, ძამბროტასა და ვან ბომელს; ისინი ალბათ სხვა კლუბებში გააგრძელებენ კარიერას.

ვეტერანი ვარსკვლავების გაცილების ცერემონიალი ძალიან ამაღელვებელი გამოდგა, გუნდის ტიფოზებმა და თავად ფეხბურთელებმაც ბევრი ცრემლი დაღვარეს. ალბათ სხვანაირად არც შეიძლებოდა, ლეგენდების წასვლა ყოველთვის მტკივნეულია, ისინი ხომ კლუბისა და მსოფლიო ფეხბურთის ისტორიას ქმნიან.