უკვე დიდიხანია, რაც საქართველოში დასაქმება მუდმივ პრობლემად
იქცა. მთავრობების ცვლილებასთან ერთად, დასაქმების იმედი ყოველთვის მატულობს, მაგრამ
მალევე ვხვდებით დაპირებების აბსურდულობას.
რამდენიმე წლის წინ, საქართველოში შეიქმნა საჯარო სამსახურის ვებ–გვერდი HR.GOV.GE, რომლის მეშვეობითაც საქართველოს
ნებისმიერ მოქალაქეს აქვს შესაძლებლობა, ონლაინ გააკეთოს განაცხადი საჯარო სამსახურში არსებულ ნებისმიერ ვაკანსიაზე და
დასაქმდეს. ეს არის ერთადერთი გზა, დასაქმების მსურველმა
მონაწილეობა მიიღოს კონკურსში და დაიწყოს კარიერა საჯარო სამსახურში. აქედან გამომდინარე, ამ ვებ–გვერდზე დარეგისტრირებულია 139, 847 სამსახურის მაძიებელი და 383 საჯარო უწყება/დამსაქმებელი. თუმცა, ეს ყველაფერი, როგორც ჩანს, 95% მხოლოდ და მხოლოდ ფორმალობაა.
ქვემოთ მოყვანილ ვიდეოში კარგად არის განხილული დამსაქმებლის მიერ წაყენებული მოთხოვნების აბსურდულობა. პირველ რიგში კი, რაც ყველაზე თვალში საცემია, ეს არის კანდიდატის სასურველი ასაკი, სადაც მითითებულია 21 წლიდან, ხოლო სამუშაო გამოცდილებაში, ხშირად მოთხოვნილია 3, 4, 5 და ა.შ წლიანი გამოცდილება. საინტერესოა რა პროფესიული გამოცდილება უნდა ჰქონდეს 21 წლის ახალგაზრდა ადამიანს, რომელსაც ჯერ უნივერსიტეტიც კი არ დაუმთავრებია. სამწუხაროა, მაგრამ ყველა თინა ბოკუჩავასა და მარიამ საჯაიასნაირი გამოცდილების მქონე ვერ იქნება.
ალბათ, ბევრს აღიზიანებს ნაციონალ ირმა ნადირაშვილის გამოსვლები და მინისტრების მიერ ახლობლების დასაქმებაზე საუბარი. სამწუხაროა, მაგრამ ეს ის რეალობაა, რომელსაც ნაციონალებისგან
განსხვავებით, ოცნება ვერ მალავს. ალბათ ესეც მათი გამოუცდელობის ბრალია.სამწუხაოდ, ყველა ის ფაქტი, რასაც ნაციონალური მოძრაობა ასახელებს ახალი მთავრობის მიერ დასაქმებულ ხალხთან მიმართებით, მართალია.
ახალი მთავრობის უნიათობა იმაშიც იკვეთება საჯარო სამსახურში დასაქმებასთან მიმართებით, რომ კანდიდატების გასაუბრებაზე დაბარებაც კი ეზარებათ, რასაც ნაციონალური მოძრაობა წარმატებით ართმევდა თავს. "ქართულმა ოცნებამ" ახალ ტენდენციას ჩაუყარა საფუძველი. კერძოდ, დასაქმების მაძიებლებს, რომლებიც ამა თუ იმ სახელმწიფო დაწესებულებაში საკუთარ რეზიუმეს აგზავნიან, ცოტა ხანში უკან უბრუნდებათ პასუხი, რომ დიდი რაოდენობით განაცხადის მიღების გამო, დამსაქმებელმა სხვა პირობები დააწესა, რაც
კანდიდატმა ვეღარ დააკმაყოფილა.ეს არ არის ერთი და ორი შემთხვევა. ამ ყველაფერმა სისტემატიური ხასიათი მიიღო, რაც არაერთი ადამიანისგან შეგიძლიათ მოისმინოთ. დამსაქმებელს უფლება აქვს ნებისმიერი მოთხოვნა დააწესოს, მაგრამ უკვე გამოცხადებული კონკურსის და მიღებული განაცხადების შემდეგ ეს მის უფლებებს აღემატება.
საინტერესოა, როდის გადავა ჩვენი ქვეყანა ახალ ეტაპზე, სადაც ის დაპირებული სამართლიანობა აღდგება, რომელმაც ოცნება მთავრობაში მოიყვანა.