უკრაინული სამოქალაქო მოძრაობა "საერთო საქმის" კოორდინატორის, ალექსანდრ დანილიუკის განცხადებით, ამოუკიდებლობის მოედანზე უკრაინის სპეცრაზმის "ბერკუტის" მიერ ევროინტეგრაციის მომხრეთა დარბევის შედეგად 40 ადამიანი საავადმყოფოშია გადაყვანილი.

ამასთან, ალექსანდრ დანილიუკის თქმით, დაკავებულია აქციის 33 მონაწილე, რომლებიც კიევის მილიციის შენობაში არიან მოთავსებული. კიევის დამოუკიდებლობის მოედანზე შეკრებილი ევროინტეგრაციის მომხრეები სპეცდანიშნულების რაზმმა "ბერკუტმა" წუხელ, გვიან ღამით რეზინის ხელკეტების გამოყეებით დაარბია. ამ დროისთვის მოედანზე მობილიზებულია მილიცია, აქტივისტებმა კი თავი მიხაილის ტაძარს შეაფარეს.