სოციალურ ქსელ facebook-ზე დიდი პოპულარულობით სარგებლობს ვიდეო, რომელიც "რუსთავი 2"-ის გადაცემა "პოსტსკრიპტუმიდანაა". ჩანაწერი მართალია ძველია და სამი წლის წინანდელია, საზოგადოებაში აქტუალურობა დღემდე არ დაუკარგავს. ვიდეოში პრეზიდენტი მიხეილ სააკაშვილი სახალისო ისტორიას ჰყვება დავით ბაგრატიონზე. შეგახსენებთ, დავით ბაგრატიონი ბაგრატიონების შტოს წარმომადგენელია, რომელიც ქართული მონარქიის აღდგენის ერთ-ერთ მომხრედ მოიაზრება. მართალია, ჯერჯერობით არათუ სრულიად საქართველოს სამეფო ტახტი, სრულიად საქართველოც კი არ არსებობს (იმ მარტივი მიზეზით, რომ ტერიტორიის 20 პროცენტი ოკუპირებულია), სამაგიეროდ, ტახტის მსურველები არიან. ეს სურვილი კი განსაკუთრებით მას შემდეგ გამოიკვეთა, როდესაც ანა და დავით ბაგრატიონებს ვაჟი – გიორგი შეეძინათ. როგორც აღმოჩნდა, პატარა გიორგის ბაბუა, დედის მხრიდან, ნუგზარ ბაგრატიონი უარზეა, აღიაროს შვილიშვილის უფლებები (თუ, რა თქმა უნდა, მონარქია აღდგება) სამეფო ტახტზე, თუკი დავით ბაგრატიონი, ბავშვის მამა, მას არ აღიარებს სრულიად საქართველოს ტახტის მემკვიდრედ თუ დე-იურე მეფედ.