აი დადგა დღე, როდესაც მიხეილ სააკაშვილი პრეზიდენტი აღარ არის და ვემზადებით გიორგი მარგველაშვილის ინაუგურაციისთვის. ქვეყანაში პრობლემები მრავლადაა. მოსახლეობის უმრავლესობა ისევ სიღარიბის ზღვარს მიღმაა და გადარჩენისთვის იბრძვის. ამ ყველაფრის პარალელურად კი განვითარების და

კეთილდღეობის მომტან ნიღაბში დამალულ სვანეთის განადგურების გეგმას ყურადღებას არავინ აქცევს. სვანები კი ჯანყდებიან! დაიფიცეს რომ სვანეთს არავის დაატბორინებენ და თუ საჭირო იქნება თავს შესწირავენ საკუთარ კუთხეს. მინისტრები, პრემიერ მინისტრი და ახალი პრეზიდენტი კი ისევ ჯიუტად იმეორებს ფრაზას: ხუდონჰესი აუცილებლად აშენდება.

გვიღირს კი რაიმე სახის მოგებად სვანეთის და თუნდაც ერთი სვანის გაწირვა? რა ღირს ერთი საფლავი, რომელიც უნდა დაიტბოროს და წყალში ჩაიძიროს? რა ფასი უნდა ავიღოთ მე–12 საუკუნის ნატაძრალზე აშენებული ეკლესიის დატბორვაში? და რა ღირს ერთი ჩვეულებრივი ადამიანის სიცოცხლე? ამაზე პასუხი არავის აქვს და გააზრებულად ცდილობენ საკუთარი მიზნების შესრულებას. ეს იქნება მესამე ავტო გოლი ფეხბურთელი მინისტრისგან. ეს იქნება სიტყვის გატეხვა ყველაზე დიდი ავტორიტეტის მქონე პოლიტიკოსის, ბიძინა ივანიშვილის მხრიდან და ეს იქნება ღალატი ადამიანისგან, რომელსაც მოსახლეობა ყველაზე მეტად ენდობა. საქართველოს კათოლიკოს პატრიარქისგან. სვანები არ ნებდებიან და ისინი ამტკიცებენ რომ ცოცხლობენ. სვანეთი ჯანყდება, რაც კონსტიტუციური უფლებაა მათი. ნუ მიგვიყვანთ აჯანყებამდე!