ბევრს საუბრობენ იმ ვარსკვლავებზე, რომლებსაც მსოფლიოს საუკეთესო უნივერსიტეტები აქვთ დამთავრებული, თუმცა კარგი განათლება ჰოლივუდისთვის პრიორიტეტული სულაც არაა.

უფრო მეტიც, ჰოლივუდის ვარსკვლავთა დიდმა ნაწილმა მე-12 კლასამდეც კი ვერ მიაღწია. ''უდიპლომოთა'' სიაში კი შოუბიზნესის შემდეგი წარმომადგენლები მოხვდნენ:

ჯესიკა სიმპსონი, რომელმაც სკოლა მაშინ მიატოვა, როდესაც მისი ვოკალით ''კოლუმბია რეკორდსის'' აღმასრულებელი პროდიუსერი დაინტერესდა.

წარმოშობით კანადელი კომიკოსი ჯიმ ქერი კი სკოლიდან 16 წლის ასაკში გამორიცხეს.

ჰილტონების მემკვიდრეს, პერის ჰილტონს ხშირად უწევდა სკოლების გამოცვლა. ერთ დროს ლედი გაგას სკოლელიც კი ყოფილა, თუმცა სკოლაში წესების დარღვევის გამო გამოაგდეს და დიპლომის გარეშე დარჩა. აღსანიშნავია, რომ პერის ჰილტონი ყოველწლიურად ჩატარებული გამოკითხვებით ყველაზე სულელ ქალთა ათეულს ''ამშვენებს''.

ჯონ ტრავოლტაც ჯიმ ქერის მსგავსად 16 წლის იყო, როდესაც სკოლიდან გამორიცხეს.

ერთ-ერთი საუკეთესო მამაკაცი მსახიობი კინოს ისტორიაში, მარლონ ბრანდოც ''უდიპლომო'' ვარსკვლავია. მიუხედავად იმისა, რომ მას არ უნდოდა სკოლის მიტოვება, ის მაინც გარიცხეს.

კრისტინა ეპელგეიტმა კი საკუთარი ნებით დატოვა სკოლა მე-11 კლასში, რათა მეტი დრო დაეთმო სიმღერისთვის. პროდიუსერმა მამამ და მსახიობმა დედამ ქალიშვილს წინააღმდეგობა აღარ გაუწიეს და დაეხმარნენ ნამდვილ ვარსკვლავად ქცეულიყო.

კამერონ დიასს კი ადრეული ბავშვობიდან აწუხებდნენ სამოდელო სააგენტოებიდან და მასაც ბევრი არ უყოყმანია. სკოლის დამთავრებას არ დაუცადა და აქტიურად ჩაერთო სამოდელო საქმიანობაში. დღეს ის ჰოლივუდის ერთ-ერთი ყველაზე მაღალანაზღაურებადი მსახიობია.

14 წლის ტომ კრუზი ბედის საძებნელად ნიუ იორკში გაეშურა. ის სასულიერო სკოლაში სწავლობდა და ყველა მღვდლობას უწინასწარმეტყველებდა, მაგრამ სკოლის სპექტაკლში თამაშისას გადაწყვიტა, რომ მსახიობობა მისი საქმე იყო.

ეს იმ ცნობილ ადამიანთა ჩამონათვალია, რომლებმაც განათლების გარეშე მიაღწიეს წარმატებას, თუმცა ასეთი რამ საკმაოდ იშვიათად ხდება და მსგავსმა მაგალითებმა სწავლის მიტოვების მოტივაცია არავის არ უნდა მისცეს.