მე ვარ იესო ქრისტე, მარიას შვილი და მესია, უთხრა ვიაჩესლავ პოლუშკინმა საპასპორტო განყოფილებაში და მეორე დღეს ახალი პასპორტი აიღო.

49 წლის ჩელიაბინსკელს სახელი და გვარი ახალ პასპორტში ასე უწერია : "იეშუა ბენ მარიამ ელ მაშიახ", რაც ნიშნავს - იესო, ძე მარიასი, მესია.

განყოფილების უფროსმა იან გოლდიბაევმა განაცხადა, რომ მოქალაქე პოლუშკინმა უკვე მეხუთედ გამოიცვალა პასპორტი.

(ამ წერილის ავტორისთვის უცნობია, წინა პასპორტებით ვინ იყო პოლუშკინი:ტომი და ჯერი, მიკი მაუსი, მაიკლ ჯეკსონი, დოლჩე და გაბანა თუ რომის პაპი).

გოლდიბაევმა თქვა, რომ ხუთჯერვე, პასპორტის გამოცვლის მიზეზი რელიგიური მრწამსი იყო.

თვითონ მესიამ მედიასთან საუბარში ბრძანა, სულიწმინდასთან მუდმივი კავშირი მაქვს, ეს პასპორტი კი იმისთვის მჭირდება, რომ მისამართზე ჩავეწერო, ვიმგზავრო თვითმფრინავით და მატარებლით და იერუსალიმში სალოცავად წასვლა შემეძლოსო.

ვიაჩესლავ პოლუშკინს ცოლი და 8 წლის ბიჭი ჰყავს, მაგრამ ამბობს, რომ ცოლს გაშორებულია, შვილის არსებობას უარყოფს და თავი მესიად მიაჩნია.

ჩელიაბინსკის ეპარქიის მღვდელმა, მამაო იგორმა პოლუშკინზე თქვა, მიჰქარავს, მთელმა ქალაქმა იცის მაგ კაცის გიჟობის ამბავიო.