კითხვა: შეიძლება თუ არა ლოცვის შემოკლება?

პასუხი: ლოცვის კანონის აღსრულებისას დამაბრკოლებელი ვითარებანი ბევრნაირია: უძლურება, ფიზიკური გადაღლილობა, შემთხვევითი სტუმარი, მგზავრობის უხერხულობა და სხვა. რასაც ანგარიში უნდა გაეწიოს. ასეთ დროს ლოცვის კანონი შეგნებულად უნდა შეიკვეცოს სათანადო დრომდე. ასევე, უნდა ვუფრთხოდეთ საკუთარი თავისთვის შეღავათის მიცემას, რათა არ გამოვიწვიოთ სინდისის ქენჯნვა, რომ შეგვეძლო მეტის გაკეთება და არ გავაკეთეთ.

კითხვა: ყველა გარდაცვლილისთვის სასარგებლოა თუ არა ფსალმუნის კითხვა?

პასუხი: ფსალმუნების კითხვა გარდაცვლილთათვის დიდად კეთილი საქმეა, მაგრამ ყველა გარდაცვლილისთვის მისი კითხვა არ შეიძლება, კერძოდ: თვითმკვლელთათვის და სხვა სარწმუნოების ადამიანებისთვის.

კითხვა: ძალიან მაშფოთებს, რომ ჩემს შვილს ეზოში ურთიერთობა უწევს თავის თანატოლებთან რომელთა შორის არიან ღვთისმგმობი ოჯახის შვილები და უზნეოებიც. როგორ მოვიქცე?

პასუხი: მთავრია, მეგობრობამ ცოდვებისკენ არ უბიძგოს ადამიანს. ესაუბრეთ თქვენს შვილს მეგობრულად და ურჩიეთ, რომ ერიდოს ურთიერთობას უზრდელ, უზნეო და უკეთურ ადამიანებთან. ოღონდ ეს უნდა გააკეთოთ სიყვარულით და არა ჩხუბით და აყალმაყალით.