ტელეკომპანიების მიერ ვიდეომასალის გავრცელებამდე პატიმრების წამების ფაქტზე განცხადება შს სამინისტრომ გაავრცელა. შსს–ს ცნობით, პატიმართა მიმართ დამამცირებელი ან არაადამიანური მოპყრობის ფაქტების ორგანიზებაში „ქართული ოცნების“ დედოფლისწყაროს მაჟორიტარობის კანდიდატის მამა, კახეთის პოლიციის ყოფილი უფროსი, თამაზ თამაზაშვილი ფიგურირებს. შსს-ს დეტექტივის ნიკა კობახიძის განცხადებით, მოპოვებული მტკიცებულებების შესაბამისად დადგინდა, რომ პატიმართა მიმართ არაადამიანურიმოპყრობის ორგანიზება, მათი ვიდეოფირზე დაფიქსირება და სოლიდური ფულადი ანაზღაურების სანაცვლოდ დამკვეთებისთვის გადაცემის შეთავაზება საპყრობილის თანამშრომლებმა ამავე საპყრობილეში განთავსებული თამაზ თამაზაშვილისგან მიიღეს. ეს იყო ძველი მთავრობის განცხადება ამ ფაქტებთან დაკავშირებით. გლდანის მე-8 საპყრობილის პატიმრების ინფორმაციით, ვლადიმერ ბედუკაძე ერთადერთი ადამიანი იყო, რომელიც პატიმრებს ციხეში ადამიანურად ექცეოდა. ბედუკაძე მსჯავრდებულებს ზოგჯერ წამლებითა და სიგარეტითაც კი ეხმარებოდა.ახლახანს კი ჟურნალისტებმა ახმეტაში ჩააკითხეს ცეზარ მოსახლიშვილის, რომელიც მაგნიტოფონის ქურდობისთვის იყო დაკავებული და იხსენებს იქ გატარებულ სიმწარეს. მოსახლიშვილი ჯანმრთელობა შერყეული დაბრუნდა ციხიდან. პატიმარი, რომელიც გლდანის მერვე საპყრობილეში იხდიდა სასჯელს, ციხეში არსებულ გაუსაძლის პირობებზე საუბრობს და პატიმრების წამებაში მონაწილე პირების გვარებს ასახელებს. ციხეში ცემისა და წამების შედეგად ცეზარ მოსახლიშვილს დამოუკიდებლად გადაადგილება არ შეუძლია და, ოჯახის წევრების განცხადებით, ხშირად კრუნჩხვებში ვარდება.