ხელოვნების სფეროს წარმომადგენლები რიყეზე, რესპუბლიკის მოედანსა და ქალაქის რამდენიმე სხვა ისტორიულ უბანში მიმდინარე მშენებლობების საწრაფოდ შეჩერებას ითხოვენ. სამხატვრო აკადემიაში დღეს ძველი თბილისის დაცვის საზოგადოებრივი საბჭო შეიკრიბა, სადაც რამდენიმე საათის მანძილზე ქალაქის ისტორიული ნაწილის შენარჩუნების კონკრეტულ ნაბიჯებზე მსჯელობდნენ. ხელოვნებათმცოდნეებმა კულტურის სამინისტროსთვის სპეციალური მიმართვის ტექსტზე მუშაობა უკვე დაიწყეს.