როგორც ქალების, ისევე მამაკაცების სხვადახვა ტიპი არსებობს. ქალთა ტიპები რომ ორ ძირითად ნაწილად დავყოთ, მართლაც განსხვავებული ხასიათის ადამიანებთან გვექნება საქმე. 1. სუსტი ქალები - მათ შემადგენლობაში თავისთავად შევიყვანთ ნაზ, დამყოლ, გაუბედავ, მორცხვ ქალბატონებს, რომელთა მართვაც ადვილი შესაძლებელია, ისინი არც პრობლემებს შეგიქმნიან და არც რაიმე საფრთხეს წარმოადგენენ, შეცდომების დაშვების შანსიც ნაკლებია თავისთავად.

რაც შეეხება 2. ძლიერ ქალებს - ამ კატეგორიას მიეკუთვნებიან ქალები, რომელთაც მაღალ დონეზე აქვთ განვითარებული პიროვნული თვისებები, ანუ ისინი წარმოადგენენ პიროვნებას, საკუთარი კონკრეტული ხასიათით, პრინციპებითა და ნიშან-თვისებებით. მათ იციან რა უნდათ ცხოვრებაში, შრომობენ და იღწვიან საკუთარი მიზნის მისაღწევად, არ უშინდებიან საზოგადოებასა თუ სხვა გარემო პირობებს და მარცხსაც ღირსეულად ხვდებიან, რის შემდეგაც ისევ უტეხად და თავაწეულნი აგრძელებენ ცხოვრებას.

ბუნებრივია მამაკაცებს ამ ორი აბსოლიტურად განსხვავებული ბუნების მქონე ქალების მიმართ ასევე აბსოლიტურად განსხვავებული დამოკიდებულება გააჩნიათ. არსებობს შეხედულება, რომ კაცებს ძლიერი, ჭკვიანი, თამამი ქალები აშინებთ და მათთან ურთიერთობას ერიდებიან, ხოლო სუსტ, დამყოლ და მოსულელო ქალბატონებთან თამამად შედიან კონტაქტში. ვერავინ იტყვის, რომ ეს შეხედულება მცდარია, თუმცა ისიც დიდი სისულელე იქნება, ყველა კაცი ერთ ქვაბში რომ მოვხარშოთ, როგორც იტყვიან.

ალბათ გაგიგიათ ანდაზე - ''ალხანას ჩალხანა არ დაელევა''. როგორც ქალები არსებობენ სუსტები და ძლიერები, მშრალად რომ დავყოთ, ასევე მამაკაცებიც, ასე რომ განსხვავებულ მამაკაცებს თავისთავად განსხვავებული შეხედულება ექნებათ ამ ორი ტიპის ქალბატონების მიმართ. ყველაფერი კი გაცილებით მარტივადაა, ძლიერი ქალები მხოლოდ სუსტ მამაკაცებს თუ შეაშინებთ, მათ ურჩევნიათ სუსტ არსებასთან ჰქონდეთ საქმე, რომ თავი ძლიერად იგრძნონ და ურთიერთობების სადავე თვითონ ეპყრათ ხელში, თამამი ქალები კი თვითონ დგამენ ნაბიჯებს და იღებენ გადაწყვეტილებებს. თუმცა ისეთი სუსტი კაცებიც არსებობენ ძლიერი ქალის ფრთის ქვეშ ყოფნა რომ ურჩევნიათ, მათ არც საკუთარი სიძლიერის წარმოჩენა ადარდებთ.

რაც შეეხება ძლიერ მამაკაცს, მას თავისთავად არ აშინებს ძლიერი ქალი, პირიქით იზიდავს და უფრო სრულფასოვნადაც გრძნობს თავს მასთან ურთიერთობისას.

თქვენ რომელ კატეგორიას მიეკუთვნებით?