"ლეიბორისტული" პარტიის ლიდერი შალვა ნათელაშვილი დავით გამყრელიძის პოლიტიკაში მობრუნებას "ფეისბუქის" პირად გვერდზე ირონიული პოსტით ეხმაურება და წერს:

"ამას ველოდი, მოვესწარ, ვიცინი, აღარ ვსტირი მე ----- გილოცავთ, ხალხო, გადავრჩით ---- ექიმი, მეწარმე და ლიდერი დაგვიბრუნდა" - წერს შალვა ნათელაშვილი სოციალურ ქსელში.

ცნობისთვის, კოალიცია „ძლიერმა საქართველომ“ საარჩევნო შტაბი გახსნა, რომელსაც დავით გამყრელიძე უხელმძღვანელებს. აღნიშნულის შესახებ საარჩევნო შტაბის გახსნის ღონისძიებაზე "ძლიერი საქართველოს" წევრმა, მამუკა ხაზარაძემ განაცხადა. როგორც ხაზარაძემ აღნიშნა, პლატფორმა "ძლიერი საქართველო" ყოველდღიურად და რაც ყველაზე მთავარია, ხარისხიანად იზრდება.

"მინდა წარმოგიდგინოთ ჩემი დიდი ხნის მეგობარი, ადამიანი, რომელიც ყოველთვის იდგა იქ, სადაც ქვეყანას სჭირდებოდა. ადამიანი, რომელსაც არასდროს, არცერთ კრიტიკული სიტუაციის დროს არ დაუფიქრებია ნეიტრალური პოზიცია. ადამიანი, რომელიც ჩვენი ქვეყნისთვის ბრძოლის ყველა წინა ხაზზე იდგა. ძალიან სერიოზული პროფესიონალი, გამოცდილი ადამიანი და მინდა მადლობა გადავუხადო მას, რომ ამ ბრძოლაში მან ითავა, ჩვენი საარჩევნო შტაბის ხელმძღვანელი გამხდარიყო. მინდა, მივესალმოთ დათო გამყრელიძეს", - განაცხადა ბრიფინგზე პარტიის ერთ-ერთმა ლიდერმა მამუკა ხაზარაძემ.